Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 154,007 Autor: Folquet de Lunel Gènere: Chanson religieuse Número: XIII

 

Tant fin'amors totas horas m'afila

I	1	Tant fin’amors totas horas m’afila
		ma voluntat, qu’ieu de lauzar m’afil
	3	midons; qu’en re tan mais no s’assubtila
		mos cars sabers, qu’ieu no·n ai ta subtil
		que pogues dir l’una parte de las mil
	6	lauzors qu’om pot de lieys dir; que d’ans mil a
		no nasqueth homs la pogues dir, non guil,
		ni lunhs per lieys lauzar non pot dir guila.
II	9	Si quon virtut natural el safil a
		l’orient a·i plus qu’en autre safil,
		val mai midons qu’autra dompn’a gentil a-
	12	mor ben amar a fin aman gentil;
		e dic vos be qu’anc, depus qu’ieu senti·l
		fin pretz de lieys e dins mon cor senti l’a-
	15	mor qu’ieu li port, no fi cauza sotil
		si quon denan: tant me desasotila.
III		Midons es tals que franc cor et humil a
	18	verayamen a fin aman humil,
		quan lo troba lïal, non en re vila,
		que no s’azaut ia de far cauza vil;
	21	tant es d’onrat luec e senhoril
		que part totas dompnas pretz senhoril ha;
		si tot no·s te, qui la preg’ades, vil,
	24	ans selh, que non la prega, mot per vil ha.
IV		Ges l’eranha tan prim no teysh ni fila
		quon a mestiers qu’om lieys lauzan prim fil;
	27	se tot l’obra s’es prima, ges estrila
		non deu esser ni·s fa de luec estril;
		per qu’a mestiers qu’om ta ferm l’aperfil
	30	que sia fortz plus qu’autra s’aperfila,
		si que tos temps sia durable: si l-
		a vol hom far per s’amor, ses tot si l’ha.
V	33	E qui bon’art e belh’e maestril ha
		per far obra be fort e maestril,
		que la vuelha far frevol e fragil, a-
	36	mont tenc per fol son sen e per fragil:
		Aitals suy ieu estatz; mas aqui vil,
		que vi mon dan e que de midons vi la
	39	fina valor; mi pres Deus lum c’apil
		obrar d’obra que del ioy d’amor pila.
VI		Coms de Rodes, senher, quar ab gentil
	42	pretz mantenetz valor, e de gentil a-
		mor ben amatz ma gensor, don porti·l
		lauzor de vos, e luenh e pres porti la.
VII	45	Al bon senhor de Mercuer, qu’es el fil
		de valen pretz, que no·s romp ni·s desfila,
		chansos, vai dir qu’ieu no truep qui s’apil
	48	mielhs e fina valor qu’elh s’i apila.