Parducci, Amos. Miscellanea di letteratura del Medio Evo. IV. Granet, trovatore provenzale. Roma: Presso la Società, 1929

Codi: 189,001 Autor: Granet Gènere: Sirventes Número: III

 

Comte Karle, ye·us vuelh far entenden

I	1	Comte Karle, ye·us vuelh far entenden
		un sirventes qu'es de vera razos.
		Mos mestiers es qu'ieu dey lauzar los pros
		e dei blasmar los croys adreitamen.
	5	E devetz me de mon dreit mantener,
		quar mos dreitz es que dey blasmar los tortz.
		E si d'aisso m’avenia mais nul dan,
		vos per aisso en devetz far deman.
II		Ar chantarai de vos prumeiramen,
	10	cum del plus aut linhatge que anc fos
		etz. E foratz en totz faitz cabalos
		si fossetz larcx, don avetz pauc talan,
		que be n'avetz la terra e·l poder.
		Et en vos es guays, solatz e deportz,
	15	e troba·us hom adreyt e gen parlan
		et avinen, ab qu’om res no·us deman.
III		Senher, autz hom viu say aunidamen,
		quan pert lo sieu e non es rancuros;
		que·l Dalfis te vostras possessios
	20	e non avetz so que trobatz queren.
		Que·m breu poyretz ostejar e jazer
		per ribeiras e per pratz e per ortz,
		tro que pensetz si al vostre coman
		o al Dalfin n'ajatztout atretan.
IV	25	[De tal guerra mi paretz envejos
		qe·us auran ops cavalier e sirven.
		E si voletz que·us siervon leyalmen
		los Proensals, senh'en Coms, gardatz los
		de la forsa de totz vostres bailos,
	30	que fan a tort molt greu comandamen.
		Mas tot es dreg sol qu'ilh n'ayon l’argen!
		Don li baro se tenon tug per mortz:
		qu’hom lur sol dar, aras los vai rauban.
		E denan vos non auzon far deman.]
V	35	Ar auran luec pro cavalier valen,
		e soudadier ardit e coratjos,
		elmes e brans, tendas e papallos,
		escutz, ausbercx e bon cavalh corren,
		e fortz castelhs desrocar e cazer,
	40	e gaug e plor mesclat ab desconortz,
		en batalla cazen, feren, levan.
		E vuelh o ben, e·m play, sol qu’ieu no y an.