Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Bibliografia
* Testimonis
* Aparat crític
* Notes
* Traduccions

 

Mouzat, Jean. Les poèmes de Gaucelm Faidit. Troubadour du XIIe Siècle. Paris: A. G. Nizet, 1965

Codi: 167,043 Autor: Gaucelm Faidit Gènere: Chanso Número: 48

 

No m’alegra chans ni critz

I 1
No m’alegra chans ni critz
   
d’auzels mon fel cor engres,
   
ni non sai per qe-m chantes
   
ni perdes
  5
mos digz, car ben los perdria
   
s’ieu dizia
   
qe-m valgues
   
vas midonz precs ni merces,
   
que no-is taing ges
  10
qe-il sia per mi queritz
    perdos, tant li sui faillitz.
     
II  
Doncs, per q’er mos chans auzitz,
   
puois no-is taing qe-m perdones ?
   
Ai Dieu ! Per so qe-il pregues
  15
qe-is venges
   
de mi — car anc m’avenc dia
   
qe bauzia
   
ni no-fes,
   
ni prejars d’autra-m plagues
  20
tant, qe-m tolgues
   
liei, don taing q’ieu si’ aunitz,
    car l’ai mal sos dons grazitz.
     
III  
E, car un’ enganairitz
   
on beutatz mala nasques
  25
mi fetz faillir, taing q’ades
   
mi pendes
   
cill que, de nient, m’avia
   
mes en via
   
de totz bes ?
  30
Pero, s’om totz cels agues
   
mortz qu’an mespres,
   
e no-i fos capdels ni guitz
    Merces, totz fora delitz —
     
IV  
Pero, non sui tant partitz
  35
de Joi, ni d’ira tant pres,
   
q’ieu enquera no-i tornes,
   
s’il mostres
   
son sen e sa cortesia ;
   
cum m’auria
  40
sobrepres
   
si-l sieus cors humils, cortes,
   
francs, ben apres,
   
de joi e de pretz complitz,
    m’era de perdon aizitz.
     
V 45
Mas ab tant for’ ieu garitz
   
s’ella tant s’omilies
   
qe solamen m’entendes ,
   
pois, apres
   
vis com mos dans me chastia,
  50
s’ill plazia
   
c’aisies ?
   
e car anc fis ren qe-il pes
   
m’es tant mal pres,
   
c’ab lieis ai mains bes complitz
  55 perdutz, e sai sui trahitz.
     
VI  
E doncs, serai tant arditz,
   
c’omils, mans jointas, confes ,
   
l’irai prejar a sos pes
   
qe-m dones
  60
don : qe-m perdon’ o m’aucia !
   
Be-m plairia
   
m’aucises !
   
Mas ieu non cre qu’il fezes
   
tant qe-m plagues…
  65
Anz sai q’er sieus lo chauzitz 
    q’ieu muoir’ o viva marritz !
     
VII  
Al seignor cui Peitieus es,
   
man qe no-il pes
   
s’es per mi us nons auzitz
  70 qe val cent hocs afortitz.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI