Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Codi: 406,031 Autor: Raimon de Miraval Gènere: Canso Número: 28

 

Lonc tems ai agutz consiriers

I		Lonc tems ai agutz consiriers
		De maintas guizas et afars
		C'anc mos solatz ni mos chantars
		Non mermet ni mos alegriers.
	5	Mas er a·i camjat uzatge ;
		Aissi m'a desviat Amors
		C'a penas chans ni tems ni flors
		Mi pot donar alegratge.
II		Si d'amor mi ven destorbiers,
	10	No m'en tanh clams ni rancurars ;
		Que denan era mieus l'esguars,
		Et ieu de totz mos deziriers
		Ai segut lo plus salvatge ;
		Que ves tal don'ai mos precs sors
	15	Que·l joi, que marves preir'aillors,
		Aten de lieis ses tot gatge !
III		E conosc qu'i fauc que leugiers ;
		Mas beutatz, don mais sobramars,
		E l'acuillirs e·l douz parlars
	20	E·l rics pretz, qu'es a totz sobriers,
		M'an mes en aquest viatge,
		Don ieu meteis sai qu'es folors
		Mas foudatz vai entr'amadors
		Per sen e sens per folatge.
IV	25	Vers es qu'en autres cavaliers
		Pot cauzir e qu'ieu no·ill sui pars ;
		Tant es sos pretz valens e cars.
		Mas tant ha d'avinens mestiers
		C'obs es qu'el sieu senhoratge
	30	Ai' un dels adreitz trobadors,
		Oue sapch' enansar sas lauzors
		E·ill serva de bon coratge.
V		Molt li servirai volentiers,
		E si tot no·ill platz mos preiars,
	35	Ja no·us cuidetz que·ill si'avars
		En faitz ni en digz plazentiers.
		C'al sieu menoret mesatge
		Volria far tan grans honors
		C'al plus ric de totz mos senhors
	40	Non fis tant per homenatge.
VI		Dona, la dousors dels vergiers
		Es era vengud'e·l tems clars,
		Don totz lo mons es vertz e vars
		E paron las flors els roziers.
	45	Hueimais devon far barnatge
		Celas, c'an leials preiadors
		E contrals mais castiadors
		Demostrar lor vasalatge.
VII		Chanso, ton premier viatge
	50	Faras vas n'Azalais de cors ;
		Quar si pueis vols anar aillors,
		Plus en seras d'agradatge.
VIII		Don', el vostre senhoratge
		S'es mes Miravals e m'amors
	55	E no·us hi cal plus gardadors
		Mas un cordo per guidatge.
IX		Mantel, s'ieu ai fag folatge,
		Quar ai chauzit en las gensors,
		En cela, que mais vol valors,
	60	A tort en penrai dampnatge !