Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Codi: 406,042 Autor: Raimon de Miraval Gènere: Canso Número: 31

 

Tals vai mon chan enqueren

I		Tals vai mon chan enqueren
		Per so qu'en s'emble plus guays,
		Que d'autra part s'en irays,
		Quan au mos digz e·ls enten,
	5	Tals i a, per gelozia.
		E drut que non segon via,
		Que a bon'amor s'atanh,
		Conosc que m'en son estranh.
II		Eu no chan per autre sen
	10	Mas per so qu'amors no bays
		E que domnas valhan mais
		Per lo mieu essenhamen.
		Ieu non dic que domn'estia
		Que non am quora que sia ;
	15	Mas genser l'es, s'ilh sofranh
		Que si·n fai malvays guazanh.
III		Que ja per chastiamen
		Nulhs son bon estar non lays.
		Pus conoys quals es savays
	20	O quals es pros issamen,
		Quals es fis ni quals gualia,
		E s'adoncs so miels non tria,
		Dieus li do so don se planh
		Dona, pus sa valor franh.
IV	25	Pus ma dona m'a coven
		Qu'autr'amic non am ni bays,
		Ja. Dieus no·m sia verays,
		Si ja per nulh'autra·lh men !
		Qu'en liei ai tot quan volia
	30	D'amor e de drudairia
		Ni menor joy ni plus manh
		No vuelh, s'ab lieys mi remanh.
V		Greu pot aver jauzimen
		Adrech d'amor drutz biays,
	35	Qu'ier se det et huey s'estrays.
		Mas qui ben sier et aten
		E sap celar sa folhia
		E jau los bes e·ls embria,
		Ab que·ls tortz sidons aplanh,
	40	Joy pot aver si quo·s tanh.
VI		Qui vol solatz avinen,
		Ves na Guillelma s'eslays,
		On pretz e beutatz e jays
		S'es pauzatz sobre joven.
	45	Per que·l tramet per paria
		Ma chanso, que la chastia
		Que, s'ilha·s fier en l'aranh,
		Prenda l'aur e lays l'estanh.
VII		De midons tenh em bailia
	50	Miraval ; mas tota via
		Vuelh la comtessa gazanh
		E tot son dampnatge planh.
VIII		Per n'Audïart, on qu' ieu sia,
		Port ieu tant de senhoria
	55	Qu'ab sos amics m'acompanh
		E sos enemics estranh.