Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Glossari

* Davantal
* Aparat crític
* Notes
* Traduccions
* Imatges

 

Kolsen, Adolf. Beiträge zur Altprovenzalischen Lyrik (42 Erstmalig Bearbeitete Dichtungen). Firenze: Leo S.Olschki, 1939

Codi: 406,046 Autor: Raimon de Miraval Gènere: Canso Número: 32

 

Tug silh que·m van demandan

I   Tug silh que·m van demandan
    Si chantarai onguan mais,
    Vuelh que sapchon per que chan
    O per qual razon m'en lays.
  5 Non es mos chans tan venals
    Qu'a totz sia cominals ;
    Qu'en aquel temps vuel faire ma chanso,
    Quan mielhs m'estai d'amor e de razo.
     
II   E suy m'en tarzatz onguan,
  10 Quar sonetz d'auzel no·m pays
    Ni fresca flors de verjan
    Lo consir del cor no·m trays,
    Que m'es tan durs e corals
    Qu'a pauc seria mortals,
  15 Don nulha res no·m pot dar guerizo,
    Si ma dona no·m vol far oc del no.
     
III   Pels tortz, que las domnas fan,
    Torna domneys en abais ;
    Que tan li mostron d'enjan,
  20 Per que·l plus fis drutz s'irays.
    Trobar en pot hom de tals,
    Mas ieu no dirai ges quals,
    Que servirai, e volgra·n guizardo
    E preira·n be esmend'en loc de do.
     
IV 25 Pus tot, quan ma dona·m man,
    M'es aissi delieytz e jays
    Obezir de bon talan
    Qu'anc son mandamen non frays,
    Guardatz si·m degr'esser sals.
  30 Qu'en patz n'ai suffertz mayns mals,
    Neys del sieu dan pogr'aver fag mon pro ;
    Mas anc no·m plac res qu'a lieys non fos bo.
     
V   Qu'ielh vauc totz jorns repropchan
    Quar, on miels li sui verays,
  35 Elha·m ment e·m vai trichan.
    Er ai ben dig que savays ;
    Qu'ilh es fina e lials
    Et ieu messongiers e fals.
    Perdrai la doncs ; si totz tortz li perdo ?
  40 Ieu oc ; qu' ab mal deu hom venser felho !
     
VI   Mas li dangier son trop gran,
    Mais mentiria·n pel cays,
    C'on plus en vauc cossiran,
    No conosc qu'en re biays.
  45 Be·n puesc doncs dir mas non als ;
    Quar sa beutatz naturals
    E·l gens parlars l'a mez'en tal resso
    Qu'om, que·ylh vol mal, no·n troba companho.
     
VII   Mais d'amic, los bes e·ls mals
  50 Degr'om partir cominals ;
    Mas vos n'avetz lo gaug e·l pretz e·l pro
    Et ieu no n'ai mas ir'e cor felho.
     
VIII   Mantelh, plus qu'enperials
    Es ; qu'en vos non a ren fals,
  55 Or ni tesselh ni fonda ni peno
    Ni mais ni meyns no·y cove per razo.
     
IX   Mon Pastoret vey sobre totz baro
    De domneyar e d'armas e de do.
     
X   Mon Audiart, si·m fos aitals cum fo,
  60 Amer'ieu mais qu'ome desotz lo tro.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI