Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori

* Davantal
* Aparat crític
* Notes
* Traduccions
* Imatges

 

Stronski, Stanislaw. Le troubadour Folquet de Marseille. Genève: Slatkine Reprints, 1968

[CdT en procés d'incorporació]

Codi: 155,016 Autor: Folquet de Marseilla Gènere: Canso Número: XII

 

Per Dieu, Amors, ben sabetz veramen

I 1 Per Dieu, Amors, ben sabetz veramen
    qu’on plus deissen plus poi’ Humilitatz
    et Orguoills chai on plus autes poiatz ;
    don dei aver gaug e vos espaven
  5 c’ancse·m mostratz orguoill contra mesura
    e brau respos a mas humils chanssos,
    perqu’es semblans que l’Orguoills chaia jos,
    qu’après bei jorn ai vist far nuoich escura.
     
II   Mas vos non parposcatz far faillimen ;
  10 pero, qan faill cel qu’es pros ni prezatz,
    tant cant val mais tant n’es plus encolpatz,
    qu’en la valor poia·il colp’ e deissen,
    e qand hom tot perdona·l forfaitura
    ja del blasme no·il sera faitz perdos,
  15 car cel reman e·il ma la sospeissos
    qu’a mainz met cel qui vas un desmesura.
     
III   Blasme n’a hom, e chascus cel asen,
    per qu’es l’enganz, e n’es plus galiatz
    aicel que·l fai que cel qu’es enganatz ;
  20 e doncs, Amors, per qu’o faitz tan soven
    qu’on plus vos serv chascus plus s’en rancura ?
    e de servir taing calque guizerdos,
    pretz o amics, meilluramens o dos :
    meins d’un d’aquestz par fols qui s’i atura
     
IV 25 Fols fui ieu ben, qe·i mis lo cor e·l sen :
    sens no fo jes, anceis fo grans foldatz,
    car cel es fols qui cuj’ esser senatz
    e sap hom meins ades on plus apren ;
    qu’anc, pos Merces que val mais que Dreichura
  30 no valc a mi ni ac poder en vos,
    pauc mi sembla m’agues valgut Razos ;
    per qu’ieu fui fols car anc de vos aic cura.
     
V   Mas er sui rics, car en vos no m’enten,
    qu’en cujar es riquess’ o paubretatz,
  35 car cel es rics qui s’en ten per pagatz
    e cel paubres qu’en trop ricor enten ;
    per qu’ieu sui rics : tant grans jois m’asegura
    qan pens cum soi tornatz desamoros,
    qu’adoncs era marritz, er soi joios ;
  40 per qu’ieu m’o teing a gran bonaventura.
     
T1   Cortesia non es als mas mesura,
    mas vos, Amors, no saubetz anc que fos ;
    per qu’ieu serai tant plus cortes de vos
    qu’al major briu calarai ma rancura.
     
T2 45 A N’Aziman et a·N Totztemps t’atura,
    chansos, car lor es, e de lor razos,
    c’atressi s’es chascus pauc amoros,
    mas semblan fan de so don non an cura.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI