Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,016 Autor: Folquet de Marselha Gènere: Canso Número: VIII

 

Per Dieu, Amors, ben sabetz veramen

I		Per Dieu, Amors, ben sabetz veramen
		c’on plus deisen plus poja Humilitatz
		et Orgoills chai on plus aut es pojatz;
		don dei aver gauch e vos espaven
	5	qu’ancse·m mostres orgoill contra mesura
		e brau respos a mas humils chansos:
		per qu’es semblanz que l’Orgoills chaia jos,
		c’apres bel jorn ai vist far nueg escura.
II		Mas vos no par poscatz far faillimen;
	10	pero, can faill cel qu’es pros ni prezatz,
		tan com val mais tan n’es plus encolpatz,
		qu’en la valor poja·l colpa e deisen;
		e quant hom tot perdona·l forfaitura
		ja del blasme no·ill sera fatz perdos,
	15	c’aicel reman en mala sospeisos
		qu’a manz met cel qui vas un desmesura.
III		Blasme n’a hom, e chascus cela s’en,
		per que n’es plus en l’engan galiatz
		aicel que·l fai c’aisel qu’es enganatz;
	20	e vos, Amors, per que·l fatz tan soven
		c’on plus vos serv chascus plus s’en rancura?
		E de servir taing qualque guiardos,
		pretz o amics, meilluramenz o dos:
		menz d’un d’aquestz par fols qui s’i atura.
IV	25	Ben fui eu fols, que·i mis lo cor e·l sen:
		senz no fo ges, enans fo granz foudatz,
		car sel es fols qui cuj’ esser senatz
		e sap hom menz ades on plus apren;
		e, pois Merces que val mais que Dreitura
	30	non valc a mi ni ac poder en vos,
		pauc mi sembla m’agues valgut Rasos;
		per qu’eu fui fols car anc de vos ac cura.
V		Mas ar sui rics, car en vos no m’enten,
		qu’en cujar es riquesa e paubertatz,
	35	car sel es rics qui s’en ten per pagatz
		e sel paubres qu’en trop ricor enten;
		per qu’eu sui rics: tan grans jois m’asegura
		quan pes qu’eu sui tornatz desamoros,
		c’adoncs era marritz, ar sui joios;
	40	per qu’eu m’o tenc a gran bonaventura.
VI		Cortesia non es als mas mesura,
		mas vos, Amors, non saubes anc que·s fos;
		per qu’eu serai tan plus cortes de vos
		c’al major briu calarai ma rancura.
VII	45	A N’Aziman et a·N Totztemps t’atura,
		chansos, car lor es e de lor rasos,
		c’aitressi s’es cascus pauc amoros,
		mais semblan fan de so don non an cura.
		Versione β
I		Per Dieu, Amors, be sabetz veramen
		c’on pus dissen pus pueja Humilitatz
		et Erguelh cai on pus aut es pujatz;
		don dei aver gaug e vos espaven
	5	c’ancse·m mostretz erguelh contra mezura
		e brau respos a mas humils chansos:
		per qu’es semblans que l’Orguelhs caia jos,
		c’apres bel jorn ai vista nueg escura.
II		Mas vos no·m par puscatz far falhimen;
	10	pero, can falh selh qu’es pros ni prezatz,
		tan can val mais tan n’es pus encolpatz,
		qu’en la valor pueja·l colpa e dissen;
		e sitot hom perdona·l forfaitura
		ja del blasme no sera fatz perdos,
	15	e cel reman en mala sospeisos
		c’a mans met sel qui vas us desmezura.
III		Blasme n’a hom, e cascus sela s’en,
		per qu’es en eis l’enganz plus galiatz
		aisel que·l fai que sel qu’es enganatz;
	20	e doncx, Amors, per que·l fatz tan soven
		c’om plus vos serv cascus pus s’en rancura?
		E del servir tanh calque guazardos,
		precx o amicx, melhuramens o dos:
		ses us d’aquest par fols qui s’i atura.
IV	25	Fols fuy ieu be que mis lo cor e·l sen:
		sens non fon ges, enans fon gran foldatz,
		car sel es fols que cuja esser senatz
		e sap hom mais ades on pus apren;
		c’anc pos Merces que val mais que Dreitura
	30	no valc a mi ni ac poder en vos,
		pauc me sembla m’ages valgut Razos;
		per qu’ieu fuy fols car anc de vos aic cura.
V		Mas ar soi rics pus en vos no m’enten,
		qu’en cujar es riquez’ e paubretatz,
	35	car sel es ricx que s’en ten per paguatz
		36   e sel paubres qu’en trop ricor enten;
		[...] ricx tan grans gaug m’asegura
		can pens com soi tornatz dezamoros,
		c’adoncx era marritz, ar soi joios;
	40	per qu’ieu m’o tenc a gran bonaventura.
VI		Cortezia non es als mas mezura,
		mas vos, Amors, non saubes anc que·s fos;
		mais yeu serai tan pus cortes que vos
		c’al major brui celarai ma rancura.
VII	45	A N’Aziman e a·N Tostems t’atura,
		chansos, que lor es e de lor razos,
		c’atressi s’es cascus pauc amoros,
		mas semblan fan de so don non an cura.