Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,059 Autor: Guiraut Riquier Gènere: Vers Número: XXIX

 

No puesc per ren

I	1	No puesc per ren
		lo ben
	3	que conosc far,
		ni ges no puesc al contrari fugir;
		ni·m puesc del tot a vertat acostar,
	6	ni aitan pauc abstener de mentir,
		ni puesc tener lo camin que deuria,
		e vau soven lai on ops no m’auria;
	9	don desservisc leyal senhor veray
		per seguir un fals e mal que·m dechai.
II		E sai que ren
	12	de ben
		no·m pot donar
		le mals, ans crey tot cert que·m vol aucir;
	15	e·l bos senhers, si·m vuelh, vol m’en gardar,
		e·m vol far ric a mo voler complir:
		donc, si del mal tenc derenan la via,
	18	ma folhors er trop piegers d’aurania;
		per que, si puesc, mo voler non creirai,
		quar sens m’en deu desviar, si ges n’ai.
III	21	Mos sens per ren
		del ben
		no·s deu cessar
	24	contra·l voler que·m fa mals abellir;
		quar mos sens deu mo folh voler sobrar,
		e·l bes lo mal per razon, so m’albir.
	27	Mas selh que tot pot e tot sap m’en sia,
		si·l plai, guida, qu’estiers far no·s poiria:
		tant ai seguit mo folh voler savay,
	30	qu’a ma razon et a mon sen desplai!
IV		Qui vol far ren
		ses ben
	33	deu albirar
		lo mal e·l dan que li·n pot avenir,
		e deu ab sen voler apoderar;
	36	quar de mal far se deu pena seguir;
		e de ben far meritz, qui no·l cambia;
		mas el merit de Dieu hom no·s fadia:
	39	donc per ben far podem tug esser guai,
		o per lo mal marrit per totz temps may.
V		Mas una ren
	42	el ben
		continuar
		truep: que no·y deu esperansa falhir;
	45	et un’autra el mal dous permenar:
		que·l peneden fa temoros tremir
		quan ab afan ben fazen s’en desvia.
	48	Pero, bes l’es! Mas magers li seria
		bes far ses mal qu’apres mal bes, so sai;
		mas de quascu salvacïos s’eschay.
VI	51	De belh deport, de gaug, de manentia
		pot esser ferms —si tot s’es aspra·l via—
		selh que layssa l’escur e sec lo rai
	54	de la via qu’al tot poderos play.
VII		Gracïoza verges sancta Maria,
		maires de Crist filh de Dieu: nuech e dia
	57	prega per nos lo teu sant filh veray,
		que·ns endresse al regne seu sanct, gay.
VIII		Per tu, dona, esper que cobraraj
	60	so que perdut per mo falhimen ay.