Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Codi: 047,008 Autor: Pons de la Garda Gènere: Canso Número: III

 

Plus ai de talan que no soill

I		Plus ai de talan que no soill
		com pogues far ausir chantan
		co·m ten Amor en son coman
		e con fai de me so que·l plai,
	5	qu'era·m fa chantar aitan be
		ab lo laç tenps et ab la gran freidor
		com degra far lai el tenps de pascor.
II		On plus vau, plus am e plus voill
		ab fin cor e de bon talan
	10	la bela qe·m compret baisan :
		era l'am tan qu'eu no puesc mai
		e non sai per qe me deve ;
		que can li plaç qe·m fai ben ni honor
		et eu l'am mais ; no sai co s'es d'amor.
III	15	E cant me fai senblant d'orgoill,
		ges l'amor no·s baissa per tan ;
		anç es vers, e no·m torn a dan,
		ma domna, q'eu no·us posc ni·us sai
		desamar, per neguna re ;
	20	ni voill esser en luec d'enperador
		per qu'en de vos vires mon cor aillor.
IV		Ja non serion las mei oill
		d'esgardar leis ni·l seu semblan,
		neis si durava·l jorn un an,
	25	tant m'es bel tot can diç ni fai
		que de nul maltrag no·m sove ;
		que sei bel oill e sa fresca color
		m'alumna·l cor en gaug et en dousor.
V		Lo maltrag don eu plus mi doill
	30	es car ades no·l son denan ;
		e si la vei pro en pensan,
		qe·ls oils del cor teng ades lai,
		mas lo desir es sai ab me,
		et m'agra mort loncs tenps a de dolor
	35	se·l douç baisar no fos qui m'en socor.
VI		Li lauzengier son d'un escuelh
		ab aquels que van devinan
		l'autrui joy et es enuetz gran
		quar ja·ls pros s'en meton en play ;
	40	et on mais val, meyns hi cove,
		quar aver deu de si mezeys paor
		selh que d'autruy ditz enuetz ni folhor.