Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Codi: 210,017 Autor: Guillem de Berguedan Gènere: Sirventes Número: Apèndix

 

Reis, s'anc nuill temps fos francs ni larcs donaire

I		Reis, s'anc nuill temps fos francs ni larcs donaire
		ni encobitz per las autrui moillers,
		penedenssatz vos en cum hom pechaire :
		q'eras lor etz enemics e gerriers,
	5	e parec ben ogan al primier cors
		que vos vim far a las primieiras flors.
		Per que dompna s'oimais vos a bon cor,
		de vostr'aver vol creisser son tresor.
II		Reis, si fos vius lo pros coms, vostre paire,
	10	non fera pas per mil marcs de deniers :
		la Marquesa far fondejar ni traire
		aissi cum faitz vos ab vostres archiers.
		Na Sibiuda trai per un dels auctors
		cui vos ametz et ill vos fetz amors,
	15	que, si non ment en Raimons de Timor,
		plus durs l'era que la frusca del tor.
III		E puesc vos dir planamen mon vejaire,
		reis deschauzitz, ben a doz' ans entiers,
		e pot vos hom ben mostrar e retraire
	20	la comtessa q'es dompna de Beders,
		a cui tolgues — qan vos det sas amors —
		doas ciutatz e cent chastels ab tors.
		De tot en tot era de perdre l'or
		tro·l de Saissac i mes autre demor.
IV	25	Reis castellans, q'etz en luec d'emperaire,
		aissi cum etz rics de totz bos mestiers,
		mandat [z] viatz per tot vostre repaire
		vostras grans ostz, a flocs et a milliers ;
		e faitz nos sai un avinen socors,
	30	per que totz temps n'ajatz pretz e lauzors :
		q'a Lerida vej'om dinz e defor
		los fums de l'ost e nos de Montesor.
V		Coms de Tolsan, parton se las amors
		s'a Marquesa non faitz calque socors,
	35	que val trop mais non fetz Elionor :
		eras parra si l'amatz de bon cor.