Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,027 Autor: Folquet de Marselha Gènere: Canso Número: X

 

Us volers outracuidatz

I		Us volers outracuidatz
		s’es inz e mon cor aders,
		pero no·m ditz mos espers
		ja puosc’ esser acabatz,
	5	tan aut s’es enpens;
		ni no m’autreia mos sens
		qu’eu sia desesperatz,
		e son aissi mitadatz
		que no·m desesper
	10	ni aus esperansa aver.
II		Car trop me sui aut pujatz
		vas qu’es petitz mos poders,
		pero·m chastia temers,
		car aital ardimens fatz
	15	notz a maintas gens;
		mas d’un conort sui jauzens
		que·m ven devas autre latz
		e mostra·m c’umelitatz
		l’a tan en poder
	20	que bes m’en pot eschazer.
III		Tant i es mos cors pausatz
		que·l mensonja·m sembla vers:
		c’aitals maltraitz es lezers;
		pero si sai qu’es vertatz
	25	que bons aturs vens;
		per qu’e·us prec, dompna valens,
		que sol d’aitan mi sofratz –
		e pois serai jen pagatz –
		que·m laisses voler
	30	lo gaug qu’eu desir vezer.
IV		Be·m parec nesietatz
		e trop sobrarditz volers,
		quan solamen us vezers
		m’ac desebut tan viatz
	35	qu’escondudamens
		mi venc al cor us talens
		tals don fui enamoratz:
		mas puois s’es tan fort doblatz
		que maitin e ser
	40	mi fai doussamen doler.
V		[De re no·m sent malmenatz
		vas vos, mas quar mos sabers
		me sofranh a dir plazers;
		e quar soi desmezuratz
	45	d’amar leialmens,
		cre que·m faill mos essiens;
		pero si·n fos dreitz jutgatz,
		ja non degr’ esser blasmatz,
		c’aital no-saber
	50	deuriatz en grat tener.]
VI		Car aissi cantar no·m platz,
		si m’en valgues esteners!
		pero laissars, non-calers
		m’en fora jois e solatz,
	55	oimais, puois n’es mens
		l’emperaritz cui jovens
		a pujat’ els ausors gratz;
		e si·l cors non fos forsatz
		eu fera saber
	60	c’om fols si sap decazer.
VII		A! dousa res covinens,
		venca vos humelitatz,
		puois nuls autre jois no·m platz
		ni d’autre voler
	65	non ai engien ni saber.
VIII		Que tans sospirs n’ai gitatz
		per que·l jorn e·l ser
		pert sospiran mon poder.