Chiarini, Giorgio. Jaufre Rudel. L'amore di lontano. Roma: Carocci, 2003.

Codi: 262,006 Autor: Jaufre Rudel de Blaja Gènere: Vers Número: VI

 

Quan lo rossinhols el foillos

		a)
I	1	Quan lo rossinhols el foillos
		dona d’amor e·n quier e·n pren,
		e mou son chan jauzen joios	[240]
		e remira sa par soven,
	5	e·l riu son clar e·l prat son gen,
		pel novel depon que reingna
		me ven al cor grans jois jazer.
II		D’aquest’amor son tan cochos	[245]
		que, quant eu vauc vas leis corren,
	10	vejaire m’es qua reusos
		m’en torn e qu’ela m’an fugen.
		E mos cavals i cor tan len,
		greu er c’uimais i ateingna	[250]
		s’Amors no la·m fa remaner.
III	15	De tal domna sui cobeitos,
		a cui non aus dir mon talen;
		ans, quant remire sas faisos,
		totz lo cors m’en vai esperden.	[255]
		E aurai ja tan d’ardimen
	20	que l’aus dir per sieu mi teingna,
		pois d’als non ll’aus merce querrer?
IV		A!, com son siei dit amoros
		e siei fait son fin e valen:	[260]
		qu’anc non nasquet sai entre nos
	25	neguna c’aia cor tan gen;
		graille es, fresc’ab cors plazen,
		e non cre genser s’enseingna,
		ni anc homs non la poc vezer.	[265]
V		Amors, alegre·m part de vos
	30	per so car vau mon mieillz queren;
		e son d’aitan aventuros
		qu’enquar n’aurai mon cor jauzen:
		la merce de mon Bon Guiren,	[270]
		que·m vol e m’apel’ e·m deigna
	35	e m’a tornat en bon esper.
[VI		E qi sai reman delechos
		e Dieu non sec en Belleen,
		non sai com sia ja mais pros	[275]
		ni cum ja venh’a guerimen;
	40	q’ieu crei e sai, mon escïen,
		que sel cui Jesus ensenha
		segur’ escola pot tener.]
		b)
I	1	Quan lo rossinhols el folhos	[280]
		dona d’amor e·n quier e·n pren,
		e mou son chan jauzent joios
		e remira sa par soven,
	5	e·l riu son clar e·l prat son gen,
		pel novel deport que·i renha	[285]
		mi vai grans jois al cor jazer.
II		D’un’amistat sui enveios,
		quar no sai joia plus valen
	10	c’or e dezir, que bona·m fos
		si·m fazia d’amor prezen:	[290]
		que·l cors a gras, delgat e gen
		e ses ren que·i desconvenha;
		es amors bon’ab bon saber.
III	15	D’aquest’amor sui cossiros
		vellan e pueis sompnhan dormen:	[295]
		quar lai ai joi meravelhos,
		per qu’ieu la jau jauzitz jauzen.
		Mas sa beutat no·m val nien,
	20	quar nulhs amics no m’essenha
		cum ieu ja n’aia bonsaber.	[300]
IV		D’aquest’amor sui tan cochos
		que quant ieu vau ves lieis corren
		vejaire m’es qu’ a reversos
	25	m’en torn e qu’ela·s n’an fugen.
		E mos cavals vai aitan len,	[305]
		a greu cug mais que i atenha
		s’ela no·s vol aremaner.
V		Amors, alegre·m part de vos
	30	per so quar vau mo mielhs queren;
		e sui en tant aventuros	[310]
		qu’enqueras n’ai mon cor jauzen:
		mas pero per mon Bon Guiren,
		que·m vol e m’apell’e·m denha,
	35	m’es ops a parcer mon voler.
VI		E qui sai rema deleitos	[315]
		e Dieu non siec en Belleen,
		no sai cum ja mais sia pros
		ni cum ja venh’a guerimen;
	40	qu’ieu sai e crei, mon escien,
		que selh cui Jhesus ensenha	[320]
		segur’escola pot tener.