Cluzel, Irénée. Princes et troubadours de la maison royale de Barcelone-Aragon. "Boletín de la Real Academia de Buenas Letras de Barcelona", 27 (1957-1958), pp. 321-373.

Codi: 160,001=180,001 Autor: Frederic de Sicilia, Coms d'Empuria Gènere: Deux coblas avec tornada Número: V, 1

 

Ges per guerra no·m chal aver consir / A l'onrat rei Frederic terz vai dir

I	1	Ges per guerra no·m chal aver consir
		ne non es dreiz de meus amis mi plangna,
		c'a mon secors vei mos parens venir,
		e de m'onor chascuns se forza e·s langna
	5	per che·l meu nom major cors pel mon aia;
		e, se neguns par che de mi s'estraia,
		no l'en blasmi, ch'en men tal faiz apert
		ch'onor e prez mos lignages en pert.
II		Pero·l reson dels Catelans auzir
	10	e d'Aragon puig far part Alamagna,
		e so ch'enpres mon paire gent fenir.
		Del rengn'aver crei che per dreiz me tangna,
		e se per so de mal faire m'asaia
		niguns parens car li cresch'onor gaia,
	15	ben porra far dampnag'a deschubert
		ch'en altre vol no dormi ni·m despert.
III		N’Ebble, va dir a cui ch'ausir s'o plaia
		che dels Latins lor singnoriu m'apaia,
		per qu'eu aurai lor, e il me per sert:
	20	mas mei parenz mi van un pauc cubert!
		Responsiva del Con d'Enpuria :
I		A l'onrat rei Frederic terz vai dir
		q'a noble cors no·s taing poder sofrag[n]a,
		perre q'om te, e pusc li ben plevir
		che dels parenz ch'aten de vas Espagna
	25	secors ogan non creia ch'a lui vaia,
		mas a l'estiu fasa cont[e] che l’aia,
		e dels amics, e tegna l'ioll ubert,
		che l'acoilla pales e [des]cubert.
II		Ne no·s cuig ges che·l seus parenz desir
	30	ch'el perda tan che·l regne no·il remagna,
		ne·l bais d'onor per Franzeis enrechir,
		ch'en laiseron lo plan e la montagna.
		Confunda·ls Deus e lor orgoil dezaia!
		Pero lo rei e Cicilian traia
	35	onrant del faitz, che·l publat e·l desert
		defendon ben: d'acho sion apert.
III		Del gioven rei me plaz car non s'esmaia
		per paraulas, sol q'a bona fin traia
		so che·l paire chonquis a lei de sert,
	40	e, si·l reten, tenrem l’en per espert.