Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Codi: 217,008 Autor: Guilhem Figueira Gènere: Sirventes Número: 7

 

Un nou sirventes ai en cor que trameta

I	1	Un nou sirventes ai en cor que trameta
		A l’emperador a la gentil persona,
		Qu’eras m’a mestier qu’en son servizim meta,
		Que nulhs hom plus gen de lui non guazardona,
	5	Qu’elh gietal paubre de paubreira
		El valen melhura e reve;
		Per qu’es dreitz qu’el guazanh e conqueira,
		Pus tan fai d’onor e de be.
		Per que quascus hom deu benezir la via
	10	De tan bon senhor, per on el va e ve;
		Et ieu benezisc lei per ma dona Dia
		E per En Taurel, quar tan gen se capte.
II		Non tenc per senat home que s’entremeta
		De far a lui tort, qu’om plus greu non perdona,
	15	Tro qu’el pot venjar; e guardatz de Gayeta,
		Cum el la destruis. Fols es qui ab lui tensona,
		Quar trop es sa forsa sobreira.
		Quar li tensonet no sai que
		. . . . . . . . . . . . . . . . . . . . . . . . . . .
	20	. . . . . . . . . . . . . . . . . . . . . . . . . . .
		Mout be s’es venjatz de la falsa clercia
		E del papa mielhs que son avi no fe.
		Segurs pot estar dedins s’albergaria,
		Que tug siei guerrier li van clamar merce.
III	25	En bon ponh fon natz et en bona planeta
		Nostr’emperador, qu’om a tort ochaizona,
		Qu’eras son Lombart vengut tro a Barleta
		Per rendre a lui totz los dregz de la corona,
		E Genoalh ren la ribeira
	30	E totas las terras qu’ilh te,
		E tant es issida sa baneira
		Qu’om nos pot defendre a se.
		Ad aital senhor tanh ben la senhoria,
		Quar el sap be far so ques tanh nis cove,
	35	Et es tan sabens d’artz e d’estronomia
		Qu’el ve e conois enans so que ave.
IV		Mout fes outra mar onrad’obra e neta,
		Que Jheruzalem conques et Ascalona,
		Que anc noi pres colp de dart ni de sageta,
	40	Quan li fel soudans honrada patz e bona.
		Pueis tenc en Chipre sa careira,
		E lai mostret tan bona fe,
		E mostret lialtat tan enteira
		Qu’al don de Barut en sove,
	45	Cui sols s’eretat per gentil cortezia
		Franc emperador, que n’a tot lo cor ple
		E net e lavat de tota vilania,
		Plen de larguetat, e quis vol creza’n me.
V		E qui no m’en cre, deman don a Berreta
	50	O al cavayer de Parm’ o de Cremona,
		Aquelh de Darnelh carguat una carreta
		E mil onsas d’aur. Ben aja, qu’aissi dona!
		Totz temps n’amarai mais Figueira
		Que de lui lauzar nos recre
	55	Ni non ditz paraula messongeira
		De l’emperador. Que jasse
		Lo sans dieus li guart tota sa manentia,
		Si cum elh ama verai pretz e mante!
		Et a mi don dieus gaug d’amic et d’amia,
	60	E don joi al comte Ramon qu’onor soste.
VI		Belhs amics Taurel, vostra mercadaria
		Vos la vent hom mal, e vos vendetz la be.
VII		Belhs amics Taurel, vos e ma dona Dia
		Devetz ben amar selh c’a nom de ric fre.