Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,037 Autor: Bertran de Born Gènere: Canso Número: I

 

Rassa, tant creis e mont'e poia

I	1	Rassa, tant creis e mont’e poia
		Cella qu’es de toz enjanz voia
		Sos pretz c’a las meillors enoia,
		C’una no·i·a que re i noia
	5	De vezer que sa beutatz loia
		Los pros a sos obs, cui qu’en coia ;
		Que·l plus conoissent e·l meillor
		Mantenon ades sa lausor
		E la tenon per la gensor ;
	10	E sap far tant entiera honor,
		Non vol mas un sol preiador.
II		Rassa, domn’ai qu’es fresqu’e fina,
		Cuenda e gaia e mesquina :
		Pel saur, ab color de robina,
	15	Blanca per cors corn flors d’espina,
		Coude mol ab dura tetina,
		E sembla conil per l’esquina.
		A la fina fresca color,
		Al bon pretz et a la lausor,
	20	Podon be triar la meillor
		Sil que se fan conoissedor
		De mi vas cal part ieu ador.
III		Rassa, als rics es orgoillosa,
		E fai gran sen a lei de tosa
	25	Que non voill Peitieus ni Tolosa
		Ni Bretaigna ni Saragosa,
		Ans es tant de pretz enveiosa
		C’als pros paubres es amorosa
		Et a·m pres per castiador :
	30	Prec li que·m teingna car s’amor
		Et am mais un pro vavasor
		Que comt’o rei galiador
		Que la menes a desonor.
IV		Rassa, rics hom que ren non dona
	35	Ni honra ni acuoill ni sona
		E que senes tort ochaisona
		E, qui·ll quier merce, no perdona
		M’enoia, e tota persona
		Que servize non gazardona.
	40	E li ric home cassador
		M’enueion e·l busatador
		Gaban de volada d’austor,
		Que ja mais d’armas ni d’amor
		Non parlara hom entre lor.
V	45	Rassa, aisso voill que vos plassa :
		Rics hom que de guerra no·s lassa
		Ni no s’en recre per menassa
		Troq’om se lais que mal no·l fassa
		Val mais que ribieira ni cassa,
	50	Que bon pretz n’acuoill e n’abrassa.
		Maurin ab N’Aigar, son seignor,
		Tenc hom per bon envazidor.
		E·l vescoms defenda·l s’onor,
		E·l coms deman la·l per vigor,
	55	E veiam l’ades al pascor !