Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Codi: 248,014=141,001 Autor: Guiraut Riquier, Envejos Gènere: Tenso (Partimen) Número: VIII

 

Aras s'esfors, n'Eveyos, vostre sens

I		Aras s'esfors, n'Eveyos, vostre sens,	[Guiraut]
		car be·us er obs, si·l mielhs sabetz triar:
		totas las artz que per estudiar
		pot clercx aver sabretz fondadamens,
	5	o·l joy d'amors vos sera tant aizitz,
		que per totas donas seretz grazitz
		que amaretz. Enpero la partida
		que layssaretz perdetz a vostra vida.
II		D'est partimen, Guiraut Riquier, breumens	[Enveyos]
	10	vos respondray, si tot m'es greu per far,
		c'ap cossir m'er lo dezir a layssar
		per Mon Cristalh vergonhos e temens.
		Mays trop vuelh mays de lieis esser faizitz,
		que perdre tans de bels sabers complitz,
	15	car d'amor vei que neys la pus complida
		sap pus d'enjan que gualiotz ni crida.
III		Enveyos, so per c'om vieu pus jauzens	[Guiraut]
		m'avetz laissat, e·l mielhs per razonar;
		yeu me puesc far a tal don[a] amar
	20	que·m fara ric, e mos naturals sens
		ab mon saber dara·m pretz qu'er auzitz,
		e vos vieuretz ab las set artz marritz,
		que·us torbaran la vista e l'auzida
		co fay a motz, tant que·l sens lur n'oblida.
IV	25	Per Dieu, Guiraut, jes no soi penedens	[Enveyos]
		de so c'ay dig, car lo mielhs es, so·m par,
		e puesc vos o per yssample proar,
		c'avetz auzit de motas de las gens
		que·l rey David e Samson fon traitz,
	30	e Salomon e <E>ro<d>s, segon c'om ditz,
		per fol'amor fon lor valor delida.
		Si s'er de vos, si Dieus no·us n'es gandida.
V		On mais parlat, val vostra razos mens,	[Guiraut]
		n'Enveios, car no sabetz ben pauzar
	35	c’ab fol’amor deu totz hom mescabar,
		si·s feron tug aquilh; e·l partimen[s]
		ditz c'a mi er ses tot embarc joy guitz.
		Mas vos blasmatz donas com descauzit:
		be·us valran pauc las artz, pus sens no·us guida,
	40	car senes sens es sciensa delida.
VI		Guiraut, nulh hom, si non es conoissens	[Enveyos]
		e si non a sen en so que deu far,
		non pret un huou ni hom no·l deu prezar;
		mas hom savis es prezat veram<e>ns
	45	et en totz locx onratz et aculhitz;
		e vos, Guiraut, remanret escarnit,
		et er pus greu vostr'arma escarnida:
		coverte·us donc, o non avetz gandida.
VII		Enveios, Peire de Fraisse, qu'es guitz	[Guiraut]
	50	de bel saber, vuelh jutje nostre dit,
		car so qu'ieu dic es mielhs d'esta p<a>rtida,
		si be·us parlatz <c'>arma s'en de<s>abrida.
VIII		Guiraut, lo dreg vuelh sia esclarzitz	[Enveyos]
		per el, car es de bel sabers complitz,
	55	car ma partz es en dreg pus afortida
		que la vostra e par a la fenida.