Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,032 Autor: Bertran de Born Gènere: Sirventes Número: XXIII

 

Pois lo gens terminis floritz

I	1	Pois lo gens terminis floritz
		S’espandis jauzions e gais,
		M’es vengut en cor que m’eslais
		De far un novel sirventes
	5	On sapchon li Aragones
		C’ab mal agur,
		D’aisso sion il tuich segur,
		Sai venc lo reis, don es aunitz,
		Esser soudadiers logaditz.
II	10	Sos bas paratges sobrissitz
		Sai que fenira coma lais
		E tornara lai don se trais :
		A Meillau et en Carlades.
		Quan qecs n’aura son dreich conques,
	15	An s’en vas Sur !
		Greu er que en mar no·l debur
		L’aura, car tant es pauc arditz,
		Flacs e vans e sojornaditz.
III		Proenssa pert, don es issitz,
	20	Que son frair Sanson prezon mais,
		Q’el non a soing mas que s’engrais
		E beva per Rossillones
		Don fo deseretatz Jaufres ;
		Q’a Vilamur,
	25	En Tolsa·l tenon per prejur
		Tuich cill ab cui s’era plevitz
		Car los a per paor giquitz.
IV		Lo reis cui es Castrasoritz
		E ten de Toleta·l palais
	30	Laus que mostre de sos eslais
		Sai al fill del Barsalones,
		Car per dreich sos malvatz hom es.
		Del rei tafur
		Pretz mais sa cort e son atur,
	35	Non fatz cella don fui trahitz
		Lo jorn q’el fon per mi servitz.
V		Lo bons reis Garsia Ramitz
		Cobrera, qan vida·il sofrais,
		Aragon, qe·l monges l’estrais
	40	E·l bons reis navars, cui dreitz es,
		Cobrara ab sos Alaves,
		Sol s’i atur.
		Aitant cum aurs val plus d’azur,
		Val mais e tant es plus complitz
	45	Sos pretz que del rei apostitz.
VI		Per cella de cui es maritz,
		Per la bona reïna·m lais,
		E des qe·m dis so don m’apais.
		Berengier de Besaudunes
	50	Li retraissera, si·l plagues,
		Mas tot rencur
		Sos malvatz faitz, que son tafur,
		Car per el fo mortz e trahitz,
		Don es sos lignatges aunitz.
VII	55	Mout trahi laich l’emperairitz
		Cum fals reis perjurs e savais
		Qan pres a qintals et a fais
		L’aver que Manuels trames
		E la rauba e tot l’arnes ;
	60	Pois ab cor dur,
		Qan n’ac traich lo vert e·l madur,
		El n’enviet per mar marritz
		La dompna e·ls Grecs q’el ac trahitz.