Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,030 Autor: Bertran de Born Gènere: Chanson de croisade Número: XXXIII

 

Nostre Seigner somonis el meteis

I	1	Nostre Seigner somonis el meteis
		Totz los arditz e·ls valenz e·ls prezatz,
		Q’anc mais guerra ni cocha no·l destreis,
		Mas d’aqesta si ten fort per grevatz ;
	5	Qar presa es la vera crotz e·l reis,
		E·l sepolcres ha de socors fraichura,
		Don tuit crezem ab lial fe segura
		Qe lo saintz focs i deissen, q’om o ve,
		Per qe no fai nul esfortz qui so cre.
II	10	Cel qui es coms e ducs et sera reis
		S’es mes enan, per q’es ses prez doblatz,
		Q’el vol mais prez q’om de las doas leis :
		Dels cristians e dels non-bateiatz.
		E s’el vol prez, a las obras pareis,
	15	Q’el vol tan prez e tan bon’aventura
		– Per qe sos prez creis ades et meillura –,
		Q’el vol lo prez del mal e·l prez del be ;
		Tant ama prez q’ambedos los rete.