Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 080,022 Autor: Bertran de Born Gènere: Sirventes Número: XLV

 

Guerr'e pantais veg et affan

I	1	Guerr’e pantais veg et affan
		A mant baron malvaz, truan ;
		Pauc m’es del dol e menz del dan
		Per que·m voill alegrar chantan,
	5	Quar ab joi vauc et ab joi pes,
		E pensamenz no m’empacha
		Ni sabers no·m fai sofracha
		De far un novel serventes.
II		Guerra·m platz, si tot guerra·m fan
	10	Amors e ma domna tot l’an,
		Quar de guerra vei trair’enan
		Cortz e domnei, solatz e chan ;
		Guerra fai de vilan cortes,
		Per que·m platz gerra ben facha
	15	E·m platz qan la treva es fracha
		Dels esterlins e dels tornes.
III		Esterlins e tornes camjan,
		Tollen e meten e donan,
		Veirem dels dos reis anz d’un an
	20	Lo menz croi segon mon semblan ;
		Per so·l segner coms, ducs, marques
		N’a ben sa pegnora tracha,
		Mas metre lo fan per gacha,
		So·m diz om, Gascon et Engles.
IV	25	Ara para qui meillz poiran
		Soffrir los maltraitz ni·l mazan :
		Maint caval bai e maint feran,
		Maint escut, maint elm e maint bran,
		E maint colp ferrir demanes,
	30	Maint mur, mainta tor desfacha
		Veirem, mainta testa fracha,
		Maint chastel forsat e conques.
V		Ges non crei Frances ses deman
		Tengan lo desirit que fan
	35	A tort a maint baron presan ;
		Per que meravilha·m don gran
		Del seignor dels Aragones,
		Car a lor dan no destacha,
		Puois a lor s’a de sa pacha
	40	Desmandat lo coms, ducs, marques.
E		Qui·s voilla n’aia mal o bes
		O enpacha o desempacha
		O bratz rotz o testa fracha,
		Que tant m’es dels mortz com dels pres.
E'	45	Gai mi ten una gaia res,
		Avinenz, joves, ben facha,
		Et ai ab leis una pacha
		Com an Pisan ab Genoes.