Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Codi: 223,005a Autor: Bertran de Born Gènere: Sirventes Número: XLVII

 

Mout mi plai quan vey dolenta

I	1	Mout mi plai quan vey dolenta
		La malvada gent manenta
		Qu’ab paratge mou contenta,
		E·m plai quan los vey desfar
	5	De jorn en jorn .xx. o trenta,
		E·ls trop nutz, ses vestimenta,
		E van lur pan acaptar,
		E s’ieu ment, m’amia·m menta !
II		Vilas a costum de trueia
	10	Que de gent viure s’enueia,
		E quan en gran ricor pueia,
		L’avers lo fai folleiar ;
		Per que·l deu hom l’entremueia
		Totas sazos tener vueia
	15	E·l deu del sieu despensar
		E far sufrir vent e plueia.
III		Qui son vilan non aerma,
		En deslialtat lo ferma,
		Per qu’es folhs qui non l’amerma
	20	Quan lo ve sobrepuiar ;
		Quar vilas, pus si coferma
		E·n tan ferm loc si referma,
		De maleza non a par,
		Que tot quan cossec aderma.
IV	25	Ja vilan no deu hom planher,
		Si·l ve bratz o camba franher
		Ni ren de sos ops sofranher,
		Quar vilans, si Dieus m’ampar,
		A cel que pus li pot tanher,
	30	Per planher ni per complanher,
		No vol del sieu aiudar,
		Per c’om deu sos faitz refranher.
V		Rassa vilana, tafura,
		Plena d’enjan e d’uzura,
	35	D’erguelh e de desmezura!
		Lur faitz non pot hom durar
		Quar Dieu geton a noncura
		E leyaltat e drechura ;
		Adam cujon contrafar :
	40	Dieus lur don mal’aventura !
		Amen !