Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 366,027a Autor: Folquet de Marselha Gènere: Canso Número: XVI

 

Pos entremes me suy de far chansos

I		Pos entremes me suy de far chansos
		ben dey guardar que fals motz no·y entenda,
		e, s’ieu dic re que midons en grat prenda,
		be m’en sera rendutz bos guazardos.
	5	Et er gran tort si mos chans non es bos;
		per que? quar ylh m’a donat l’art e·l genh
		e so qu’ieu fatz non dei metre en desdenh.
II		E sitot m’es de semblant orgulhos
		non ai poder que ves autra m’atenda,
	10	qu’el cor e·il huel me mostron que·il me renda
		tan m’agradi de sas bellas faissos;
		e quan m’en cug partir, no m’es nulhs pros,
		que s’amors es denan mi qui m’atenh,
		que·m fai tornar vas lieys, tan mi destrenh.
III	15	Luenh m’es dels huelhs mas del cor m’es tan pres
		selha per cui soven planc e sospire
		que, on plus n’ai d’afan e de martire,
		dobla l’amors e nays e creys ades;
		e quar suy sieus no cug que m’enguanes,
	20	e fi me tant el sieu ensenhamen
		per qu’ai respeyt que n’aura chauzimen.
IV		Ben fera sens si de lieys me lunhes
		ans que·m laisses a la dolor aucire,
		mas Amors vol qu’ieu sia francs suffrire
	25	e ja per ren no n’aia·l cor engres;
		anc Dieus no fetz nulh hom qui ben ames
		que non crezes mais Amor que son sen,
		per que m’aven a far son mandamen.
V		Anc nuls amans per sidons no sufri
	30	tan gran dolor ni tan gran malanansa;
		per merce·l prec que·m digu’ a tal pessansa
		si·l cor non a que·s melhur enves mi,
		per que vengues plus viatz a la fi,
		qu’assatz val mais morir, al mieu semblan,
	35	que totztemps viur’ ab pena ez ab afan.
VI		Chansoneta, vai t’en tot dreyt cami
		lay a midons en cuy ai m’esperansa
		e diguas li qu’aya qualque membransa
		de me quar l’am ses enjan ab cor fi,
	40	qu’anc per ma fe des l’ora qu’ieu la vi,
		non ai mudat ni camjat mon talan,
		ans l’am ades e la dupt e la blan.
[VII]		[Seingn’ en [H]eral[h] de Polinac, montan
		vai vostre prez a chascun jor de l’an.]
[VIII]	45	[Bella-Guarda, de vos dauri mon chan
		quar negus hom non pot mentir lausan.]
		Versione α
I		Pois entremes me sui de far chanson
		ben dei gardar que fals motz no·i entenda,
		e, s’ieu dic ren que midons en grat prenda,
		be m’en sera rendutz rics guizerdos.
	5	Et agra·n tort si mos chans non er bos;
		per que? car ill mi donet l’art e·l geing
		e so q’ieu fatz non dei metre en desdeing.
II		E sitot m’es de semblan orgoillos
		non ai poder que vas autra m’entenda,
	10	qu’el cor e·il huoill mi mostron qe·il mi renda
		tant s’agradon de sas bellas faissos;
		e, qan m’en cuich partir, no m’es nuills pros,
		que·l sieus amors m’es denan qui m’ateing,
		que·m fai tornar vas lieis, tant mi destreing.
III	15	Loing m’es dels huoills mas del cor m’estai pres
		cella per cui soven plaing e sospire
		que on plus n’ai d’afan e de martire,
		dobla l’amors e nais e creis ades;
		e car sui sieus non cuig que m’enganes,
	20	e fiu me tant el sieu enseignamen
		per q’ai respieich que n’aura chausimen.
IV		Ben fora sens si de lieis mi loignes
		anz qe·m laisses a la dolor aucire,
		mas Amors vol q’ieu sia francs sofrire
	25	e ja per ren no n’aia·l cor engres;
		c’anc Dieus non fetz nuill hom que ben ames
		que non crezes mieills Amor que son sen,
		per que m’aven a far son mandamen.
V		Anc nuills amans per sidonz non sofri
	30	tan greu dolor ni aital malananssa;
		per merce·ill prec qe·m dig’ a tal pesanssa
		si cor non a qe·is meillur enves mi,
		per que vengues plus viatz a la fi,
		car meins mals es morir, al mieu semblan,
	35	qe totztemps viur’ ab pena et ab afan.
VI		Chanssoneta, vai t’en ton dreich cami
		lai a midonz en cui ai m’esperanssa
		e digas li·m c’aia calque membranssa
		de mi car l’am ses engan ab cor fi,
	40	c’anc per ma fe des l’ora q’ieu la vi,
		no mi muda ni·m camja mon talan,
		anz l’am ades e la dopt e la blan.