Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,006 Autor: Folquet de Marselha Gènere: Canso Número: XVII

 

Chantan volgra mon fin cor descobrir

I		Chantan volgra mon fin cor descobrir
		lai on m’agr’ ops que fos saubutz mos vers;
		mas per dreich gaug m’es faillitz mos sabers,
		per qu’ai paor que no·i puosca avenir:
	5	c’us novels jois en cui ai m’esperansa
		vol que mos chans sia per lieis enders,
		e car li platz qu’ieu enans sa lauzor
		en mon chantar, don ai gaug e paor,
		car sos pretz vol trop savi lauzador.
II	10	Per que no·m par qu’ieu pogues devezir
		son cortes pretz que tant aut es aders
		c’om no·n ditz ver que non semble plazers,
		e trob aitan en lieis de ben a dir
		que sofraitos m’en fai trop d’aondanssa;
	15	per qu’ieu m’en lais, que no·m ditz mos espers
		com ja pogues retraire sa valor,
		que de bon pretz a triat lo meillor
		e dels amans lo plus fin amador.
III		Pero ren als no·n ai mas lo desir:
	20	no·n ai doncs pro? Mout es grans mos poders
		si neis d’aitan m’en es donatz lezers!
		E doncs per que·m vuoill de plus enantir,
		car sos bels ris ab sa gaia semblanssa
		mi pais mos huoills, tant m’agrada·l vezers?
	25	Mas un conort n’ai que·m mou de follor:
		qu’ades m’es vis que·m vuoilla dar s’amor
		quan volv vas mi sos huoills plens de doussor.
IV		E doncs, dompna, puois mais non puosc sofrir
		los mals qu’ieu trac per vos matins e sers,
	30	merce n’aiatz! qu’el mon non es avers
		que, senes vos, mi pogues enriquir;
		e car no·us vei soven, ai gran doptanssa
		que vos mi fassa oblidar non-calers;
		mas ieu que sent la pena e la dolor
	35	no·us oblit jes, anz i tenc nuoich e jor
		los huoills del cor, si que no·ls vir aillor.
V		Anc ren non dis don non temses faillir
		vas lieis, tant l’es aturatz mos volers;
		mas derenan no m’o tolra temers,
	40	qu’eu sai que·l fuocs s’abrasa per cobrir,
		e·l dieus d’amor m’a nafrat de tal lanssa
		don no·m ten pro sojornars ni jazers,
		anz desampar, per midonz cui ador,
		tal que m’a fait gran ben e gran honor,
	45	mas ben deu hom camjar bon per meillor.
[VI]		[A vos mi ren, pros dona cui ador,
		e prendetz me que segon dreit d’amor
		deit l’om egar fin corag’ e ricor.]
		Versione γ
I		1  Chantan volgra mon fin cor descobrir
		lai on m’agr obs que fos saubutz mos vers;
		mas per dreg gaug ai perdut mon sabers,
		per c’ai paor que no·i puosc’ avenir:
	5	qu’uns novels jois en cui ai m’esperanza
		vol que mos chans sia per leis esders,
		e puis li platz qu’eu enans sa valor
		e mon chantar, dei n’aver gran lausor
		car sos pretz vol mot savi lausador.
II	10	Per que no·m par qu’ieu pogues devezir
		son cortes pretz car tan aut es aders
		que ren no·n ditz que non semble plazers,
		et a en leis tan de tot ben a dir
		que sofraita m’en fai trop d’aondansa;
	15	per qu’eu m’en lais, que ges no·m sembla vers
		qu’eu ja pogues retraire sa lausor
		car de bon pretz a triat lo meillor
		e dels amanz lo plus fin amador.
III		E doncs, pois eu no·n ai mais lo desir
	20	no·n ai doncs pro? Mout es grans mos poders
		sivals d’aitan m’en a donat lezers!
		e doncs per que·m vol de plus enardir,
		mas siei bel oill e sa gaia semblansa
		don pais mos oills, tan m’agrada·l vezers?
	25	N’ai un conort tal que mou de follor:
		c’ades m’es vis que·m voilla dar s’amor
		quan volv vas mi sos oillz plens de dousor.
IV		E doncs, domna, pois mais non puos sofrir
		los mals qu’eu trac per vos maitis e sers,
	30	merce n’aiaz! qu’e·l mon no a avers
		que, senes vos, mi pogues enriquir;
		e car no·us vei soven, ai gran doptansa
		que vos mi faissa oblidar non-calers;
		mas ieu que sen la pen’ e la dolor
	35	no·us oblit ges, anz i tenc nueg e jor
		los oillz del cor, si que no·ls vir aillor.
V		Car anc no·l dis tan tem vas leis faillir
		com s’es en leis autrejatz mos volers;
		mas derenan no m’o cal plus temers,
	40	qu’eu sai que focs s’abaissa per cobrir,
		e·l dieus d’amor a·m nafrat de tal lansa
		don no·m ten pro, sojornars ni jasers,
		qu’ieu ai laissat per lei cui eu ador,
		tal que m’a faich gran ben e gran honor,
	45	mas ben deu hom camjar bon per meillor.