Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,002 Autor: Folquet de Marselha Gènere: Canso Número: XIX

 

A pauc de chantar no·m recre

I		A pauc de chantar no·m recre
		per enueg dels lausenjadors,
		mais forsa d’amor m’en rete
		que no·m laissa virar alhors,
	5	tan soi dels benamans la flors;
		c’aisi·m te
		Amors pres el fre
		que de nulh alre no·m sove
		mas de lieis servir a jornal:
	10	c’aisi·m pes c’o fasso·l lial.
II		E doncx, s’ieu fas so que·s cove,
		be m’en deu eschazer honors,
		car qui pot amar mielhs de be
		per dreg l’en eschai la lauzors;
	15	e sap o midons et Amors
		qu’ieu en re
		vas leis no·m malme
		mas car li clam, humils, merce
		que·m des so que m’es pus coral:
	20	pot esser qu’ilh so teng’ a mal?
III		Doncx be soi fols car no·m recre
		d’amar lieis, car be·m par folors,
		pus autre bes no·m n’esdeve
		e vei c’ades creis ma dolors,
	25	qu’en mi sol a fag tot son cors;
		per ma fe
		† mielhs m’ave †	(-2)
		que per leis sofeira jasse
		mon dan, sitot a lieis no·n cal
	30	c’autra·m des s’amor per cabal.
IV		E can mi paraula ni·m ve,
		mi salh al cor la resplandors
		dels bels huelhs, e del dos ale
		mi ven mesclamens la sabors,
	35	si qu’e la boca·m nais dossors
		per qu’ieu cre
		e conosc que·l be
		qu’ieu dic de lieis non ai de me,
		ans m’ieis de s’amor natural
	40	que m’a ins el cor pres ostal.
V		E pus aquest gaug me mante,
		si·m volgues far tan de socors
		que·m denhes retener ab se,
		gardatz s’ieu fora dels aussors!
	45	que sos ricx pretz e sa valors
		mi reve
		del tot e·m soste,
		e sol qu’ilh agues lo mile
		de la dolor fer’ e mortal,
	50	ben agram partit per egual.
VI		Pero si·l clamaray merce
		del dan qu’ilh me fai e del mal
		pus vey qu’autr’ amor no m’en val.
		Versione α
I		A pauc de chantar no·m recre
		per enoi dels lausengadors,
		mas forsa d’amor mi rete
		que no·m laissa virar aillors,
	5	tant sui dels benamans la flors;
		aissi·m te
		Amors pres el fre
		† que d’alres no·m sove  †	(-2)
		mas de lieis servir a jornal:
	10	c’aissi·m pes c’o fasso·ill leial.
II		E doncs, s’ieu fatz so que·is cove,
		be m’en deu eschazer honors,
		car qui pot amar mieills de be
		per dreich l’en eschai la lauzors
	15	e sap ben midons et Amors
		qu’ieu en re
		vas lieis no·m malme
		† mas car li clam, merce  †	(-2)
		que·m des so que m’es plus coral:
	20	pot esser que so ten a mal?
III		Doncs sui ben fols car no·m recre
		d’amar lieis, que be·m par follors,
		puois c’autre bes no·m n’esdeve
		e vei qu’ades creis ma dolors,
	25	qu’en mi sol a faich tot son cors;
		per ma fe
		† mieills m’ave  †	(-2)
		† que sofra jasse  †	(-2)
		mon dan, sitot a lieis no·n cal
	30	c’autra des s’amor per cabal.
IV		E quan mi paraula ni·m ve,
		m’asaill al cor la resplandors
		dels bels huoills, e del dolz ale
		mi ven mesclamens la sabors,
	35	si qu’e la bocha·m nais doussors
		per qu’ieu cre
		e conosc que·l be
		† qu’ieu dic non ai de me,  †	(-2)
		anz m’ieis de s’amor natural
	40	que m’a inz el cor pres ostal.
V		E puois aquel jois mi mante,
		si·m fezes aitant de socors
		que·m deignes retener ab se,
		gardatz s’ieu fora des aussors!
	45	qe sos rics pretz e sa valors
		creis en me
		meillura e ve
		ab sol qu’il agues lo dese
		de la dolor fera e mortal,
	50	nos agram partit per engal.
VI		Pero si·l clamarai merce
		del dan qu’il me fai e del mal
		pois nuill autr’ amor no mi val.