Beltrami, Pietro G. Variazioni di schema e altre note di metrica provenzale: a proposito di Bertran de Born, "Puois Ventadorns" e "Sel qui camja". "Studi Mediolatini e Volgari", 35 (1989), pp. 5-42.

Postilla 2013.

Codi: 080,010 Autor: Bertran de Born Gènere: Canso Número: II

 

Sel qui camja bon per meillor

I	1	Sel qui camja bon per meillor
		se·l mielz prent, ben deu mais valer:
		qu’ieu ai cor, e Dieus do·m poder,
		que tant serva al miellz et aor
	5	que de l’ira e de la dolor
		o·m mes sil qi·m degra valer,
		qui·m trait e cuget m’aucire,
		plaza·il que·m torn en bon esper,
		q’enves mi no·is pot escondire
	10	c’al seu tort no·m dones lezer.
II		Lemozin, ben vos deu plazer
		q’ara·us es vengutz Meillz de be:
		tant quant mars clau ni terra te
		non a domna on puosca caber
	15	lo bes q’om pot en leis vezer,
		ni a joi qui de leis no·l te,
		q’ella sap tan gen far e dire
		tot so qu’a bon pretz aperte,
		c’ab son joi fai los iratz rire,
	20	tan avinentmen se capte.
III		Aqesta vos dic que mante
		pretz e joi, tant aman honor,
		joven e solatz et amor,
		et acuoill dona, e rete
	25	grat de totz cels qui se conve:
		per que tuit sei corteiador
		parton denant lei ab desire,
		tant lor a sos vezers sabor,
		c’om no la ve que non cossire
	30	c’anc de sos oilz non vi jensor.
IV		Et a·m convenguda s’amor,
		can volra cavaller aver:
		que cel qui mais sabra valer
		soffrira per entendedor;
	35	et er ben malvatz qui non cor
		al cors on hom met tant d’aver,
		que·l meillz c’om puosca el mon eslire
		pot gazaignar e conquerer
		s’es larc et adreitz e servire,
	40	e sap far e dire plazer.
V		Guillelme Bertram, fai saber
		per tot aqest dir de part me,
		e qui pros er esforze·n se,
		paubre e ric, segon poder,
	45	q’ella volra son dig tener,
		que cel on mais valra de be
		n’aura guierdo ses desdire
		................
		q’en tal loc vol son joi assire
	50	.........
VI		Guillem, a Torena vai dire
		a·n Bos qe·is captegna tan be
		com puosca d’uoi enan eslire
		qe Amors de son joi l’estre.