Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,006 Autor: Falquet de Romans Gènere: Sirventes Número: VI

 

Far vuoill un nou sirventes

I	1	Far vuoill un nou sirventes,
		qe razon n’ai granda,
		e dirai de pretz on es,
		s’om tot no·l demanda :
	5	pretz sojorna ab los cortes
		e no·n qier liuranda
		mas joi e valor,
		e ten cellui per seignor
		q’a d’aital vianda.
II	10	Pretz vol home conoissen,
		ab fina larguesa,
		franc e leial e plazen
		e ses avolesa.
		A cellui si dona e·is ren
	15	e·i ha s’amor mesa ;
		mas paucs n’a conques
		q’en .C. baros non a tres
		complitz de proesa.
III		Ja mais negus mos amics
	20	non vuoill rics deveigna,
		pois mos seign’En Frederics,
		que sobre totz reigna,
		fo larcs enans que fos rics.
		Er li plai que teigna
	25	la terra e l’aver,
		aisso m’en comtant per ver
		chascus, qui q’en veigna.
IV		Mas ben vuoill que sapcha cert
		q’alz savis auch dire :
	30	“Qui tot vol tenir, tot pert”.
		En so se remire
		e teigna donar ubert,
		qe·il roda no·is vire
		so desus desotz,
	35	c’al virar faria totz
		sos enemics rire.
V		Et am Dieu, que sus lo mes
		e·il a dat corona,
		e son cosin lo marques,
	40	que chascus razona
		que venir l’en deu grans bes ;
		e·il razos es bona ;
		e vic, so·us autrei,
		l’amor que cel d’Est li fei
	45	e·l coms de Verona.
VI		Per q’ieu lo vuoill conseillar,
		car l’am ses bausia,
		que sos amics teigna car
		e rics tota via,
	50	que ben a poder de far
		mieils c’om q’el mon sia
		faitz d’ome valen.
		Vec vos doble faillimen
		si non o fazia.
VII	55	Emperaire, e·us vuoill pregar
		que ja greu no·us sia
		si·us dic mon talen,
		que, car vos am coralmen,
		vos mostre aital via.
VIII	60	N’Ot del Carret, be·us tenc car,
		car en Lonbardia
		non sai plus valen
		ni negus no m’en desmen
		de ben q’ieu en dia.