Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,011 Autor: Falquet de Romans Gènere: Sirventes Número: VII

 

Qan cuit chantar, eu plaing e plor

I	1	Qan cuit chantar, eu plaing e plor
		per ço qe vei esdevenir,
		q’a per pauc non muer de dolor
		qant en mon cor pens e consir
	5	la perda e·l gran dampnage
		q’a pres cortesia e solaz ;
		qar se de servir vos mesclaz
		ni·us donaz allegrage,
		il diran qe·us es fols provaz,
	10	si de tot joi non vos laissaz.
II		Tornaç es en pauc de valor
		lo segles, qi·l ver en vol dir,
		e·il clerge son ja li peior,
		qi degran los bes mantenir,
	15	ez an un tal usage
		qe mais aman guerras qe paz,
		tant lor plais maleça e pechaz ;
		per q’al primer passage
		m’en volria esser passaz,
	20	qe·l mais de qant vei me desplaz.
III		E son vers lor meçeis trator
		le mais dels rics, per qe·ls aïr,
		q’il ant oilç e non an lugor,
		q’en re non sabont avenir
	25	qe sia d’agradage,
		q’aisi·ls eisorba cobeitaz,
		enjanç e fina malvestaz
		qe destruch an parage
		e per aqels pert sas clartaz
	30	preç e valors e leialtaz.
IV		Ben volgra agessem un senior
		ab tant de poder e d’albir
		q’al avol tolgues la richor
		e no·il laisses terra tenir
	35	e dones l’eritage
		a tal qi fos pros e preisaz,
		q’aissi fo·l segles comenchaz,
		e no·i gardes linage
		e mudes hom los rics malvaç
	40	si com fai priors et abaz.
V		Ar prec al bon emperador
		qi s’es croisaz per Deu servir
		qe mueva ab força et ab vigor
		ves la terra on Deus volc morir
	45	e mes son cors en gage ;
		per nos en fo en croiz levaz
		et es totz hom desesperaz
		qi no·i a ferm corage
		qi ve com el fo clavellaz
	50	per nos e battuz e nafraz.
VI		Tuit deuriam aver paor
		qar mielç no li sabem grazir
		zo q’el sofri per nostr’amor,
		q’el receup mort per mort aucir,
	55	tan volc nostr’homenage ;
		per qe fo de bon’ora naz
		toz hom qe·l servira croçaz
		ni fara·l seu viage,
		q’anc puois q’el fo deseretaz,
	60	non ac honor crestiandaz.
VII		Emperaire, si be·us pensaz
		com Deus fai vostras voluntaz
		mout l’aurez bon corage,
		q’el vol, et es vers, ço sapchaz,
	65	qe vos cobrez sas heritaz.
VIII		Serventes, Mon-Cenis passaz
		ez a N’Oth del Carret digaz
		qe·us tramet per message
		qez an lai on Jesus fo naz ;
	70	puois er sos bons preç coronaç.