Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,012 Autor: Falquet de Romans Gènere: Chanson de croisade Número: VIII

 

Quan lo dous temps ven e vay la freydors

I	1	Quan lo dous temps ven e vay la freydors
		e de razo atruep mout gran viutat,
		ben dey chantar, quar trop n’aurai estat ;
		e a m’o tout marrimentz e dolors
	5	que ai quan vey anar a perdemen
		e destruÿr sanhta crestiantat
		e tot segle vey perdut e torbat ;
		per qu’ieu no·m puesc dar gran esbaudimen.
II		Comtes e reys, ducs et emperadors
	10	e manh baro e manhta poestat
		vey guerreyar per plana voluntat
		e·ll fort tolon als frevols lurs honors.
		E morrem tug, so sabem veramen ;
		Doncx laissara quascus sa heretat
	15	e so qu’avem de tort e de peccat
		trobarem totz al jorn del jutjamen.
III		Ailas ! caitiu, con grieus er la dolors
		e que direm quan serem ajostat
		en camp florit on veyrem clavellat
	20	Dieus en la crotz per totz nos peccadors
		e pel costat nafrat tan malamen
		e de ponhens espinas coronat !
		Adoncx volgram quascus aver cobrat
		la vera crotz e·l sieu sanh monimen.
IV	25	Quan Dieus dira : “Selhs qu’an freytz ni calors
		sufert per mi ni lur sanc escampat
		e m’an blandit e temsut et amat
		e m’an servit e fag be et honors,
		aquilh seran ab gaug, ses marrimen,
	30	e selhs qu’auran de mi tort e peccat,
		ses falhimen, que no·ls er perdonat,
		cayran laÿns el foc d’ifern arden”.
V		Adoncs er fag l’ira e·l dols e·l plors
		quan Dieus dira : “Anatz, malaürat,
	35	yns en infern on seretz turmentat
		per tostemps mais ab pena e ab dolors,
		quar non crezetz qu’ieu sufri greu turmen ;
		mortz fuy per vos, don vos es mal membrat !”
		E poiran dir selhs que morran crozat :
	40	“E nos, Senher, mort per vos eyssamen !”.