Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Codi: 344,003a=437,015 Autor: Peire Guilhem de Luserna, Sordel Gènere: Canso Número: XIV

 

En Sordell, qe vos es semblan

I	1	«En Sordell, qe vos es semblan
		de la pro comtessa prezan?
		Qe tuit van dizen e gaban
		qe per s’amor es sai vengutz,
	5	e cuiatz anz esser sos drutz
		q’en Blacatz q’es per leis canutz».
II		«Peire Gilhem, tot son afan
		mes Dieus en leis far per mon dan,
		e las beutatz qe autras an
	10	son nientz, e·l prez es menutz:
		ieu e Blacatz fossem pendutz
		anz qe nuls i fos avengutz».
III		«En Sordell, anc entendedor
		non sai vi mais d’aital color
	15	com vos es; qe·lh autr’amador
		volon lo baizar e·l iaçer,
		e vos metes a no caler
		so q’autre drut volon aver».
IV		«De leis vueilh solaz et honor,
	20	Peire Gilhem, e si d’amor
		i mesclava un pauc de sabor,
		per merce e non per dever,
		qi·s volges ages tot l’aver,
		sol q’ieu n’ages aqel plazer».
V	25	«En Sordell, plus amesuratz
		vos faitz d’amador q’anc fos natz;
		e s’el coms es aseguratz,
		el s’en poiria ben pentir;
		qar autre n’auzet[z] escarnir,
	30	Sordel, s’om vos o auzes dir».
VI		«Peire Gilhem, vos derrengatz
		a lei d’ome cui jois non platz;
		mas el coms es tan enseinhaz
		que d’aisso no·l qal mens dormir;
	35	q’om deu so celar e cobrir
		qe no·s tainh vezer ni auçir».
VII		«Sordel, fort sap pro d’escremir
		qi·s pot de vostre colp gandir».
VIII		«Peire Gilhem, ben sai sufrir
	40	lo mal d’amor e·l ben jauzir».