Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,010 Autor: Falquet de Romans Gènere: Chanson religieuse Número: IX

 

Quan ben mi soi perpensatz

I	1	Quan ben mi soi perpensatz,
		tot l’als es nïen mai Dieus ;
		c’om laissa alos e fieus
		e las autras eretatz ;
	5	ricors del setgle malvatz
		non es mas traspassamens,
		per c’om deu esser temens
		e leials ses totz engans,
		que cascuns em vianans.
II	10	Qu’aitan tost com hom es natz,
		mou e vai coma romieus
		a jornadas, et es grieus
		lo viatges, so sapchatz ;
		que cascuns vai eslaisatz
	15	ves la mort, c’aurs ni argens
		no l’en pot esser guirens,
		e sel qui mais sai viu d’ans,
		ses Dieu, mais fai de sos dans.
III		E tu, quaitiu, que faras,
	20	que conoisses mal e be ?
		Fols hiest si non ti sove
		don hiest mogutz ni on vas ;
		si·n ta vida ben no fas,
		tu mezeis t’iest escarnitz,
	25	e, si s’en part l’esperitz
		cargatz de pecatz mortals,
		ta mortz es perpetuals.
IV		Doncx gara com obraras,
		mentre que vida·t soste,
	30	qu’en pauc d’ora s’esdeve
		que hom mor en un traspas ;
		per c’om non deu esser las
		de ben far, quan n’es aizitz ;
		qu’en breu d’ora es failhitz
	35	lo jois d’aquest setgle fals
		qu’a totz es mortz cominals.
V		Non i a frevol ni fort
		que tan sapcha d’escremir
		qu’a la mort puesca gandir ;
	40	qu’ilh non gara agur ni sort,
		dreg ni meszura ni tort ;
		qu’aitan tost pren lo meilhor
		e·l plus bel co·l sordeior
		e negus hom per nul plag
	45	no·s pot gardar del sieu trag.
VI		Eu no·i sai mas un conort :
		cal c’om pens de Dieu servir
		e que·s garde de failhir
		mentre que vai ves la mort ;
	50	qu’a passar nos er al port
		on tug passan ab dolor,
		li rei e l’emperador :
		lai trobarem atrazag
		lo ben e·l mal c’aurem fag.
VII	55	Preguem Dieu per sa doussor
		que nos fassa tant d’onor
		que·ns gart de mortal agag
		tro·l sieu plazer aiam fag.