Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Codi: 156,015 Autor: Falquet de Romans Gènere: Alba religieuse Número: XIII

 

Vers Dieus, el vostre nom e de sancta Maria

I	1	Vers Dieus, el vostre nom e de sancta Maria
		m’esvelharai hueimais, pus l’estela del dia
		ven daus Jerusalem que·ns essenha quec dia :
		Estaitz sus e velhatz,
	5	senhors que Dieus amatz,
		que·l jorns es aprosmatz
		e la nuech ten sa via ;
		e sia·n Dieus lauzatz
		per nos e adoratz
	10	e·l preguem que·ns don patz
		a tota nostra via.
		La nuech vai e·l jorns ve
		ab clar cel e sere
		e l’alba no·s rete,
	15	ans ve belh’e complia.
II		Senher Dieus que nasquetz de la Verge Maria
		per nos guerir de mort e per restaurar via
		e per destruir enfern que·l Diables tenia
		e fos en crotz levatz,
	20	d’espinas coronatz
		e de fel abeuratz,
		Senher, merce vos cria
		aquestz pobles onratz ;
		que·lh vostra pietatz
	25	lor perdon lor peccatz.
		Amen, Dieus, aissi sia !
		La nuech vay e·l jorns ve
		ab clar cel et cetera ...
III		Qui no sap Dieus prejar, ops es que o aprenda
		et auja qu’ieu dirai et escout et entenda :
		Dieus, que comensamens es de tota fazenda,
		laus vos ren e merce
	35	de l’onor e del be
		que m’avetz faitz ancse ;
		e prec, Senher, que·us prenda
		gran pietat de me,
		que no·m truep ni·m malme
	40	ni m’engane de re
		Diables, ni·m mesprenda.
		La nuech vai e·l jorns ve
		et cetera ...
IV		Dieus, donatz me saber e sen ab qu’ieu aprenda
		vostres sanhs mandamens e·ls auja e·ls atenda ;
		e·l vostra pietatz, que·m guerisc’e·m defenda
		en est segle terre,
	50	que no·m trabuc ab se ;
		quar ie·us ador e·us cre,
		Senher, e·us fauc ufrenda
		de me e de ma fe,
		qu’aissi·s tanh e·s cove ;
	55	per so vos crit merce
		e de mos tortz esmenda.
		La nuech vai e·l jorns ve
		ab clar cel e sere
		et cetera ...
V		Aquel glorios Dieus qui son cors det a venda
		per totz nos a salvar prec qu’entre nos estenda
		lo sieu Sant Esperit, que de mal nos defenda,
		e d’aitan nos estre :
	65	josta los sieus nos me
		lai sus on si capte
		e·ns meta dins sa tenda.
		La nuech vai e·l jorns ve
		et cetera ...