Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Codi: 437,029 Autor: Sordel Gènere: Sirventes Número: XXII

 

Qui be·is membra del segle qu'es passatz

I	1	Qui be·is membra del segle qu’es passatz
		con hom lo vi de toz bos faitz plazen,
		ni com hom ve malvatz ni recrezen
		aquel d’aras, ni com ja restauratz
	5	non er per cel qi vendra plus malvaz,
		totz hom viura ab gran dolor, menbran
		cals es, ni fo, ni er d’aissi enan.
II		Mas non es dreitz c’om valenz ni prezatz
		si recreza per aital membramen,
	10	anz taing s’esforz tot jorn plus vivamen
		com sufra·l fais de pretz, qu’es mesprezatz;
		car cel n’a mais que plus fort n’es cargatz,
		e car es dreitz que s’esforço·il prezan
		de ben, on plus l’avol s’en van laissan.
III	15	En plus greu point non pot nuillz esser natz,
		com cel que pert Dieu e·l segle issamen;
		tot aital son li trist malvaz manen,
		c’ant mes a mort domnei, joi e solatz;
		tant los destreing nonfes e cobeitatz,
	20	c’onor e pretz en meton en soan,
		e Dieu e·l mon en getan a lur dan.
IV		Ai, com pot tan esser desvergoingnatz
		nuls hom gentils, que an enbastarden
		son lignage per aur ni per argen?
	25	Qe l’avers vai leumenz e la rictatz,
		e·ill vida es breus, e la mortz ven viatz;
		per c’om degra lialmen viure, aman
		Deu, retenen del mon grat, gen regnan.
V		Dels maiors mou tota la malvestaz,
	30	e pois apres de gra en gra dissen
		tro als menors, per que torna a nien
		jois e pretz, si que, qui pretz vol ni·l platz,
		pot n’aver leu, car tant n’es granz mercaz
		que per cinc solz n’a hom la peza e·l pan:
	35	si·l tenon vil li ric malvaz truan!
VI		N’Agradiva, qui quez estei malvatz,
		per vos azir malvestat et enjan
		et am valor e joi e pretz e chan.
VII		Al rei tramet mon sirventes viatz,
	40	cel d’Aragon, que·l fais lo plus pesan
		sosten de pretz, per que·l ten en treman.