Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,009 Autor: Marcabru Gènere: Vers Número: IX

 

Aujatz de chan com enans' e meillura

I	1	Aujatz de chan com enans' e meillura,
		E Marcabrus, segon s'entensa pura,
		Sap la razon e·l vers lassar e faire
		Si que autr' om no l'en pot un mot traire.
II	5	Per so sospir car mouta gens ahura
		De malvestat c'ades creis e pejura ;
		So m'en somon que sia guerrejaire,
		C'a lieis sap bo qan m'au cridar e braire.
III		Li sordeior an del dar l'aventura
	10	E li meillor badon ves la penchura ;
		La retraissos fai trist e sospiraire
		C'a rebuzos fant li ric lor afaire.
IV		No·i a conort en Joven, mas trop fura,
		Ni contra mort ressort ni cobertura,
	15	Qu'ist acrupit l'an gitat de son aire
		E de cami, per colpa de la maire.
V		Qui per aver pert vergonh' e mezura
		E giet' honor e valor a non cura
		Segon faisson es del semblan confraire
	20	A l'erisson et al gos et al laire.
VI		Proeza·s franh et avoleza·s mura
		E no vol Joi cuillir dinz sa clauzura ;
		Dreit ni razon no vei mantener gaire
		Quan per aver es uns gartz emperaire.
VII	25	Coms de Peitieus, vostre Pretz s'assegura
		Et d'en Anfos de sai, si gair' ill dura,
		Car Avignon e Proenssa e Belcaire
		Te miels per sieu no fes Tolzan sos paire.
VIII		S'aquest n'Anfos fai contenensa pura
	30	Ni envas mi fai semblan de frachura,
		Lai vas Leo en sai un de bon aire
		Franc de razo, cortes e larc donaire.
IX		De Malvestat los gart Sanct' Escriptura,
		Que no lur fassa cafloquet ni peintura ;
	35	Sel qu'es e fo regom recx e salvaire
		La sospeiso del rei n'Anfos m'esclaire.