Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,010 Autor: Bernart de Ventadorn Gènere: Canso Número: X

 

Bel m'es qu'eu chan en aquel mes

I	1	Bel m’es qu’eu chan en aquel mes
		can flor e folha vei parer,
		et au lo chan doutz pel defes
		del rossinhol matin e ser.
	5	adoncs s’escha     qu’eu aya jauzimen
		d’un joi verai     eu que mos cors s’aten,
		car eu sai be que per amor morrai.
II		Amors, e cals onors vos es
		ni cals pros vo·n pot eschazer,
	10	s’aucizetz celui c’avetz pres,
		qu’enves vos no s’auza mover ?
		mal vos estai     car dols de me no·us pren,
		c’amat aurai     en perdos lonjamen
		celei on ja merce no trobarai !
III (V)	15	Pois vei que preyars ni merces
		ni servirs no·m pot pro tener,
		per amor de Deu me fezes
		ma domna cal que bo saber !
		que gran be fai     us paucs de jauzimen
	20	a cel que trai     tan gran mal com eu sen ;
		e s’aissi mor, requisitz li serai.
IV (VI)		Garit m’agra si m’aucizes,
		c’adoncs n’agra faih so voler.
		mas eu no cre qu’ela fezes
	25	re c’a me tornes a plazer.
		agra·n esglai     e penedera s’en ?
		ja no creirai,      no m’am cubertamen,
		mas cela s’en vas me per plan essai !
V (IV)		Del major tort qu’eu anc lh’agues,
	30	vos dirai, si·us voletz, lo ver :
		amara la, s’a leis plagues,
		e servira·lh de mo poder.
		mas no s’eschai     qu’ilh am tan paubramen ;
		pero be sai     c’assatz for’ avinen,
	35	que ges amors segon ricor no vai.
VI (III)		Gran mal m’a faih ma bona fes,
		que·m degra vas midons valer ;
		e s’eu ai falhit ni mespres
		per trop amar ni per temer,
	40	doncs que farai ?     ai las, chaitiu dolen !
		c’a totz es mai     de bel aculhimen,
		mas me tot sol azira e dechai.
VII		El mon non es mas una res
		per qu’eu joya pogues aver ;
	45	e d’aquela no·n aurai ges,
		ni d’autra no·n posc ges voler.
		pero si ai     per leis valor e sen,
		e·n sui plus gai     e·n tenc mo cors plus gen,
		car s’ilh no fos, ja no m’en meir’ en plai !
VIII		Messatger, vai,      e porta me corren
		ma chanso lai,      Mo Frances, part Mauren ;
		e digas li·m que breumen lo verai.