Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,004 Autor: Bernart de Ventadorn Gènere: Canso Número: IV

 

Amors, e que·us es veyaire

Hdss. AL
I.		Amors, e que·us es veyaire ?		Amors, e que·us es veyaire ?
		trobatz mais fol mas can me ?		trobatz * fol mas can me ? (-1)
		cuidatz vos qu’eu si’ amaire		cuidatz * qu’eu si’ amaire
		e que ja no trop merce ?		e que ja no trop merce ?
	5	que que·m comandetz a faire		so que·m comandetz a faire
		farai o, c’aissi·s cove ;		farai eu, c’aissi·s cove ;
		mas vos non estai ges be		mas vos non estai ges be
		que·m fassatz tostems mal traire.		que·m fassatz tostems mal traire;
II.		Eu am la plus de bon aire		Qu’eu am la plus de bon aire
	10	del mon mais que nula re ;		del mon mais que nula re :
		et ela no m’ama gaire :		et ela no m’ama gaire ;
		no sai cossi·s esdeve !		no sai per que s’esdeve !
		e can plus m’en cuit estraire,		e can eu m’en cuit estraire,
		eu no posc c’Amors me te.		eu no posc, c’Amors me te.
	15	träitz sui per bona fe.		träitz sui per bona fe,
		Amors, be·us o posc retraire !		Amors, be·us o posc retraire !
III.		Ab Amor m’er a contendre,		Ab Amor m’er a contendre,
		que no m’en posc estener,		que no m’en posc mais tener,
		qu’en tal loc me fai entendre		qu’en tal loc me fai entendre
	20	don eu nul joi non esper		don eu nul be non esper :
		(anceis me fari’a pendre		ans per pauc me feira pendre
		car anc n’aic cor ni voler) ;		car sol n’ai cor ni voler ;
		mas eu non ai ges poder		mas eu non ai ges poder
		que·m posca d’Amor defendre.		que·m posca d’Amor defendre.
IV.		Pero Amors sap dissendre		Pero Amors sol dissendre
		lai on li ven a plazer,		lai on li ven a plazer,
		e sap gen guizardo rendre		que·m pot be guizardo rendre
		del maltraih e del doler.		del maltraih e del doler.
		tan no·m pot mertsar ni vendre		tan no·m pot mersar ni vendre
	30	que plus no·m poscha valer,		que mais no·m poscha valer,
		sol qu’Ela·m denhes vezer		sol ma domna·m denh vezer
		e mas paraulas entendre.		e mas paraulas entendre.
VI.		Eu sai be razon e chauza	V.	Qu’eu sai be razon e chauza
		que posc’ a midons mostrar :		que posc a midons mostrar :
	35	que nuls om no pot ni auza		que ges lonjamen non auza
		enves Amor contrastar ;		aissi Amor contrastar,
		car Amors vens tota chauza ;		mas Amors vens tota chauza,
		e forsa·m de leis amar ;		que·m venquet de leis amar :
		atretal se pot leis far		atretal se pot leis far
	40	en una petita pauza !		en una petita pauza.
V.		Grans enois es e grans nauza	VI.	Ben es enois e grans nauza
		tot jorn de merce clamar ;		de tostems merce clamar ;
		mas l’amor qu’es en me clauza,		mas l’amors qu’es en me’n clauza,
		no posc cobrir ni celar.		no·s pot cobrir ni celar.
	45	las ! mos cors no dorm ni pauza		las ! mos cors no dorm ni pauza
		ni pot en un loc estar,		ni pot en un loc estar,
		ni eu no posc plus durar,		ni eu non o posc plus durar,
		si·lh dolors no·m asoauza.		si·lh dolors no·m asoauza.
VII.		Domna, res no vos pot dire		Domna, nuls om no pot dire
	50	lo bo cor ni·l fin talan		lo meu bo cor ni·l talan
		qu’e·us ai, can be m’o cossire,		qu’eu ai, can de vos cossire,
		c’anc re mais non amei tan.		c’anc re mais non amei tan. (-1)
		tost m’agran mort li sospire,		mort m’agran li sospire,
		domna, passat a un an,		domna, passat a un an,
	55	no·m fos per un bel semblan,		(si) no fosso·lh bel semblan,
		don si doblan mei dezire.		per que·m doblon mei dezire.
VIII.		No·n fatz mas gabar e rire,		No·n fatz mas gabar e rire,
		domna, can eu re·us deman ;		domna, can re vos deman ;
		e si vos amassetz tan,		mas si vos amassetz tan,
	60	alres vos n’avengr’a dire.		alres vos n’avengr’a dire.
IX.		Ma chanson apren a dire,
		Alegret ; e tu, Ferran,
		porta la·m a mo Tristan,
		que sap be gabar e rire.