Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,029 Autor: Bernart de Ventadorn Gènere: Canso Número: XXIX

 

Lo rossinhols s'esbaudeya

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

   

I	1	Lo rossinhols s’esbaudeya
		josta la flor el verjan,
		e pren m’en tan grans enveya
		qu’eu no posc mudar, no chan ;
	5	mas no sai de que ni de cui,
		car eu non am me ni autrui,
		e fatz esfortz, car sai faire
		bo vers, pois no sui amaire.
II		Mais a d’Amor qui domneya
	10	ab orgolh et ab enjan
		que cel que tot jorn merceya
		ni·s vai trop umilian ;
		c’a penas vol Amors celui
		qu’es francs e fis, si com eu sui.
	15	so m’a tout tot mon afaire
		c’anc no fui faus ni trichaire ;
III		C’aissi com lo rams si pleya
		lai o·l vens lo vai menan,
		era vas lei que·m guerreya,
	20	aclis per far so coman.
		per aisso m’afol’ e·m destrui
		(don a mal linhatge redui),
		c’ams los olhs li don a traire,
		s’autre tort me pot retraire.
IV	25	Soven me rept’ e·m plaideya
		e·m vai ochaisos troban ;
		e can ilh en re feuneya,
		vas me versa tot lo dan.
		gen joga de me e×sdesdui,
	30	que d’eus lo seu tort me conclui.
		mas ben es vertatz que laire
		cuida, tuih sion sei fraire !
V		Om no la ve que no creya
		sos bels olhs e so semblan,
	35	e no cre qu’ilh aver deya
		felo cor ni mal talan ;
		mas l’aiga que soau s’adui,
		es peyer que cela que brui.
		enjan fai qui de bon aire
	40	sembla e non o es gaire.
VI		De tot loc on ilh esteya,
		me destolh e·m vau lonhan,
		e per so que no la veya
		pas li mos olhs claus denan.
	45	(car) cel sec Amors que·s n’esdui
		e cel l’enchaussa qu’ela fui.
		ben ai en cor del estraire
		tro que vas midons repaire.
VII		Ja non er, si tot me greya,
	50	qu’enquer fin e plaih no·lh man ;
		que greu m’es c’aissi·m recreya
		ni perda tan lonc afan.
		a sos ops me gart e·m estui,
		e si non em amic amdui,
	55	d’autr’ amor no m’es vejaire
		que ja mais mos cors s’esclaire.
VIII		Enaissi fos pres com eu sui
		Mos Alvernhatz, e foram dui,
		que plus no·s pogues estraire
	60	d’en Bel Vezer de Belcaire.
IX		Tristan, si no·us es veyaire,
		mais vos am que no solh faire.