Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,035 Autor: Bernart de Ventadorn Gènere: Canso Número: XXXV

 

Per melhs cobrir lo mal pes e·l cossire            

I	1	Per melhs cobrir lo mal pes e·l cossire
		chan e deport et ai joi e solatz ;
		e fatz esfortz car sai chantar ni rire,
		car eu me mor e nul semblan no·n fatz ;
	5	e per Amor sui si apoderatz,
		tot m’a vencut a forsa, ses batalha.
II		Anc Deus no fetz trebalha ni martire,
		ses mal d’amor, qu’eu no sofris en patz ;
		mas d’aquel sui, si be·m peza, sofrire,
	10	c’Amors mi fai amar lai on li platz ;
		e dic vos be que s’eu no sui amatz,
		ges no reman en la mia nualha.
III		Midons sui om et amics e servire,
		e no·lh en quer mais autras amistatz
	15	mas c’a celat los seus bels olhs me vire,
		que gran be·m fan ades can sui iratz ;
		e ren lor en laus e merces e gratz,
		qu’el mon non ai amic que tan me valha.
IV		Molt me sap bo lo jorn qu’eu la remire :
	20	la boch’ e·ls olhs e·l fron e·ls mas e·ls bratz
		e l’autre cors, que res no·n es a dire
		que no sia belamen faissonatz.
		gensor de leis no poc faire Beltatz,
		per qu’eu m’en ai gran pen’ e gran trebalha.
V	25	A mo talen volh mal, tan la dezire,
		e pretz m’eu mais, car eu fui tan auzatz
		qu’en tan aut loc auzei m’amor assire,
		per qu’eu m’en sui conhdes et ensenhatz.
		e can la vei, sui tan fort envezatz :
	30	vejaire m’es que·l cors al cel me salha.
VI		Dins en mo cor me corrotz e·m azire,
		car eu sec tan las mias volontatz. —
		mas negus om no deu aital re dire,
		c’om no sap ges com s’es aventuratz.
	35	que farai doncs dels bels semblans privatz ?
		falhirai lor ? mais volh que·l mons me falha !
VII		Ab lauzengers non ai ren a devire,
		car anc per lor no fo rics jois celatz.
		e dic vos tan que per mon escondire
	40	et ab mentir lor ai chamjatz los datz.
		ben es totz jois a perdre destinatz
		quez es perdutz per la lor devinalha.
VIII		Corona, man salutz et amistatz
		e prec midons que m’ayut e me valha.
[IX	45	E quem volha, sia sens o foudatz,
		no·m pot esser ni afans ni trebalha.]