Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 016b,001 Autor: Aldric del Vilar Gènere: Vers avec réponse Número: XX

 

Tot a estru

I	1	Tot a estru
		Vei, Marcabru,
		Que comjat voletz demandar.
		Del mal partir
	5	Non ai cossir,
		Tant sabetz Mesur' esgardar.
II		Ia non creiretz
		D'aquesta vetz
		Cels qui nos volrian mesclar.
	10	No·t teing per mois
		Si non conois
		Qual te vol far refolleiar.
III		Grans er tos sens,
		Si ren sai prens,
	15	Per nuilla paor de chantar
		En rauca votz
		Que ruich e glotz
		E non glafilla n'aut ni clar.
IV		S'agues aver
	20	E mon poder,
		Garnitz vos fora del donar,
		E car non l'ai,
		Prendetz balai,
		Que non podetz ren al portar.
V	25	Petitz enfans
		M'as trobatz tans
		Que l'uns non pot l'autre levar ;
		Cill m'an escos,
		Fe que dei vos,
	30	Tot quant eu solia gabar.
VI		De gran folles
		T'es entremes,
		Cum fes lo moutos de lairar,
		Quan sai de Bles
	35	A mi vengues
		Per negun aver conquistar.
VII		Reconogut
		T'ai, Pan-perdut,
		E cuidavas ton nom celar ;
	40	Quan tornaras,
		Segurs seras
		De seignor et ieu de joglar.