Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,035 Autor: Marcabru Gènere: Vers Número: XXXV

 

Pax in nomine Domini !

I	1	Pax in nomine Domini!
		Fetz Marcabrus los motz e·l so.
		Aujatz que di:
		Cum nos a fait, per sa doussor,
	5	Lo Seingnorius celestiaus
		Probet de nos un lavador,
		C’anc, fors outramar, no·n fon taus,
		En de lai deves Josaphas:
		E d'aquest de sai vos conort.
II	10	Lavar de ser e de maiti
		Nos deuriam, segon razo
		Ie·us o afi.
		Chascus a del lavar legor;
		Domentre qu'el es sas e saus,
	15	Deuri' anar al lavador,
		Que·ns es verais medicinaus;
		Que s'abans anam a la mort,
		D'aut en sus aurem alberc bas.
III		Mas Escarsedatz e No-fes.
	20	Part Joven de son compaigno.
		Ai! cals dols es,
		Que tuich volon lai li plusor,
		Don lo gazaings es enfernaus!
		S'anz non correm al lavador
	25	C'ajam la boca ni·ls huoills claus,
		Non i a un d'orguoill tant gras
		C’al morir non trob contrafort.
IV		Que·l Seigner que sap tot quant es
		E sap tot quant er e c'anc fo,
	30	Nos i promes
		Honor e nom d'emperador.
		E·il beutatz sera, — sabetz caus —
		De cels qu'iran al lavador?
		Plus que l'estela gauzignaus;
	35	Ab sol que vengem Dieu del tort
		Que·ill fan sai, e lai vas Domas.
V		Probet del lignatge Caï,
		Del primeiran home felho,
		A tans aissi
	40	C'us a Dieu non porta honor;
		Veirem qui·ll er amics coraus;
		C'ab la vertut del lavador
		Nos sera Jhesus comunaus;
		E tornem los garssos atras
	45	Qu'en agur crezon et en sort !
VI		E·il luxurios corna-vi,
		Coita-disnar, bufa-tizo,
		Crup-en-cami
		Remanran inz el felpidor;
	50	Dieus vol los arditz e·ls suaus
		Assajar a son lavador;
		E cil gaitaran los ostaus;
		E trobaran fort contrafort,
		So per qu'ieu a lor anta·ls chas.
VII	55	En Espaigna, sai, lo Marques
		E cill del temple Salamo
		Sofron lo pes
		E·l fais de l'orguoill paganor,
		Per que Jovens cuoill avol laus.
	60	E·l critz per aquest lavador
		Versa sobre·ls plus rics captaus
		Fraitz, faillitz, de proeza las,
		Que non amon Joi ni Deport.
VIII		Desnaturat son li Frances,
	65	Si de l'afar Dieu dizon no,
		Qu'ie·us ai comes.
		Antiocha, Pretz e Valor
		Sai plora Guiana e Peitaus.
		Dieus, Seigner, al tieu lavador
	70	L'arma del comte met en paus:
		E sai gart Peitieus e Niort
		Lo Seigner qui ressors del vas!