Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 124,001 Autor: Daude de Pradas Gènere: Canso Número: -

 

Ab lo douz temps que renovella

		Orthographie nach A.
I	1	Ab lo douz temps que renovella,
		vuoill faire novella chansso,
		c’amors novella m’en somo
		d’un novel joi que mi chapdella ;
	5	e d’aqest joi autre jois nais.
		e s’ieu non l’ai, non poirai mais,
		mas ades ador e soplei
		a lieis cui am de cor e ’nvei.
II		Tant mi par m’esperanssa bella
	10	que be·m val una teneso ;
		e puois espers mi fai tal pro,
		ben serai rics, si ja m’apella
		ni·m ditz: „Bels doutz amics verais,
		ben vuoil que per mi siatz gais,
	15	e ja no·is vir per nuill esfrei
		vostre fis cors del sieu dompnei.“
III		Ar ai dich so qe·m plazeria ;
		e sai que no·is pot avenir,
		que dompna non ditz son desir,
	20	anz cela plus so que volria.
		de son amic se vol honrar,
		e fai·s ades plus a pregar
		on plus la destreing sos talans ;
		mas ben val dire bos semblans.
IV	25	E qui ren sap de drudaria,
		leu pot conoiser e chausir
		qe·il beill semblan e·il doutz sospir
		non son messatge de fadia.
		mas talant ha de fadiar
	30	qui so que ten, vol demandar,
		per qu’eu conseill als fis amans
		que prenden fassan lor demans.
V		Mout sai qe·m tenran ad ufana
		car eu ai dich que fis amics
	35	i fai mout que pros e que rics
		si qan pot de sidonz s’apana ;
		mas no i cuich far negun orguoill,
		si la ren qu’eu plus am e vuoill,
		bai et abratz e vuoill saber
	40	si·l platz qu’eu aia nuill plazer.
VI		Lai on es proeza certana,
		vas Salve t’en vai, e no·t trics,
		chanssos, que·l seigner t’er abrics
		contra la folla gen vilana.
	45	e·ls dos fraires de Rocafuoill,
		on fis pretz e jovens s’acuoill,
		sapchas a tos ops retener,
		si vols en bona cort caber.