Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 366,001 Autor: Peirol Gènere: Canso Número: -

 

Ab gran joi mou maintas vetz e comenssa

I	1	Ab gran joi mou maintas vetz e comenssa
		so don hom puois a dolor e cossire.
		per mi·us o dic, que folla conoissenssa
		aic d’un semblan, ab que·m trahinet gen
	5	cill on anc plus m’entendiei finamen ;
		c’adoncs fui rics qu’esser cugei amatz ;
		aras s’es fort totz mos affars camjatz.
II		Amors a pauc de vera mantenensa
		(non o puosc mais celar ni escondire),
	10	que·il fals aman, qe·is fant fin en parvenssa,
		la decazon per lor galiamen.
		e las dompnas si·s n’ant colp’ eissamen,
		c’a penas er negus drutz, so sapchatz,
		que non engan e non si’ enganatz.
III	15	Ma dompna·m fai morir per tal faillensa,
		que l’estai mal, s’ieu lo ausava dire.
		ill n’a·l pechat, et ieu la penedenssa ;
		e ges no·il trob ochaison de nien.
		pesa·m car ai tant bon razonamen ;
	20	trop es mos dreitz conogutz e proatz ;
		mais volgra fos messonga la vertatz.
IV		Ai ! tant greu m’er, s’aissi pert m’entendensa
		del bon esper on suoill mon cor assire ;
		pero trop n’ai orgoillosa temensa,
	25	c’ab mal talan l’encolp e la repren ;
		e si·m sai eu d’amor lo meillor sen :
		c’om ja de ren non se fezes iratz,
		mas c’om saubes son mal soffrir en patz.
V		Contra midontz non posc aver tenensa.
	30	cant ieu l’esgart e vas mi la vei rire,
		tota m’osta l’ir’ e la malvolenza
		la so’ amors, que·m destregn dousament.
		e s’anc mi fez mal ni äiramen.
		can pais mos oils glotos sa grantz beutatz,
	35	cujatz c’adonc li voilla mal ? — no fatz.
VI		Follatges es qui son affar bistensa.
		no·m tenrai mais d’aisso q’ieu plus desire.
		mais vuoill c’a tort m’amiga doussa·m vensa
		que per mon dreig plor ni plaigna soven.
	40	merce·il qerrai d’eis lo sieu faillimen,
		tot enaissi cum er sa voluntatz,
		c’ab lieis no·m pot nuills plaitz esser malvatz.
VII		El vers vos man, dompna, c’a vos mi ren,
		que res aitan no m’agrada ni·m platz ;
	45	e vailla mi ma fina voluntatz.
VIII		En Vianes anera plus soven,
		mas per midonz remain sai Alvergnatz,
		prop del Dalfin, car sos afars mi platz.