Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,040 Autor: Uc de Sant Circ Gènere: Canso Número: II

 

Tres enemics e dos mals seignors ai

I	1	Tres enemics e dos mals seignors ai,
		C’usqecs poigna nuoig e jorn cum m’aucia :
		L’enemic son miei oill e·l cors, qe·m fai
		Voler celliei c’a mi non taigneria ;
	5	E l’us seigner es Amors, q’en baillia
		Ten mon fin cor e mon fin pessamen,
		L’autre etz vos, dompna en cui m’enten,
		A cui non aus mon cor mostrar ni dir
		Cum m’aucietz d’envej’e de desir.
II	10	Que farai doncs, dompna, que sai ni lai
		Non puosc trobar ren ses vos que bo·m sia ?
		Que farai ieu, cui serion esglai
		Tuich autre joi si de vos no·ls avia ?
		Que farai ieu, cui capdella e guia
	15	La vostr’amors e·m fuich e·m sec e·m pren ?
		Que farai ieu, c’autre joi non aten ?
		Que farai ieu ni cum poirai gandir,
		Si vos, dompna, no·m voletz retenir ?
III		Cum durarai ieu, que non puosc morir,
	20	Ni ma vida no m’es mas malanansa?
		Cum durarai ieu, cui vos faitz languir
		Desesperat ab un pauc d’esperanssa ?
		Cum durarai ieu, que ja alegransa
		Non aurai mais, si no me ven de vos?
	25	Cum durarai ieu, que ieu sui gelos
		De tot home qui vai vas vos ni ve
		E de totz cels a cui n’auch dire be ?
IV		Cum viurai ieu, que tant coral sospir
		Fatz nuoich e jorn que movon de pesanssa?
	30	Cum viurai ieu, cui non pot far ni dir
		Autra ses vos ren qe·m teigna ad honranssa ?
		Cum viurai ieu, c’als non port e membranssa
		Mas vostre cors e las plazens faissos
		E·ls cortes digz humils e amoros ?
	35	Cum viurai ieu, que d’als non prec de me
		Dieu mas qe·m lais ab vos trobar merce ?
V		Que dirai ieu, dompna, si no·m mante
		Fina merces, sivals d’aitan qu’eu venssa
		Ab mon fin cor et ab ma leial fe
	40	Vostra rictat e vostra gran valenssa ?
		Que dirai ieu si vos no·m faitz suffrensa ?
		Qe dirai eu, c’autra non puosc vezer
		Q’en dreich d’amor mi puosca al cor plazer ?
		Que dirai ieu, c’autra el mon non es
	45	Qe·m dones joi per nuill ben qe·m fezes ?
VI		A la valen comtessa de Proenssa,
		Car son siei fach d’onor e de saber
		E·il dich cortes e·il semblan de plazer,
		An ma chansos, car cella de cui es,
	50	Me comandet c’a lieis la trameses.