Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,015 Autor: Uc de Sant Circ Gènere: Canso Número: XII

 

Estat ai fort longamen

I	1	Estat ai fort longamen
		Vas lieis q’es falsa leials,
		Et ai escerchatz mos mals ;
		Per so n’ai pres maint turmen ;
	5	E no·n qier don ni esmenda,
		Ni mais no·m platz q’ieu atenda
		Acort ni dura merce
		Ni plazer ni joi ni be
		Que sofren amors mi renda.
II	10	Qu’ieu la servi finamen,
		C’anc mos servirs non fo sals,
		Ni no·il volgui esser fals,
		Ni m’anei vas leis volven ;
		Mas autre conseill taing prenda
	15	Tal que eu vuoill c’om mi penda
		Si mais l’obezisc en re ;
		Car dreitz es en leial fe
		C’aissi con hom compra venda.
III		Mon cor li loing e·il defen,
	20	E pens oimais chascus d’als,
		E plassa·il mos dans mortals,
		Que·m plaz lo sieus eissamen,
		E no·i a autra contenda ;
		E vuoill qe·il done prevenda
	25	Aital cum donava a me,
		E que ella l’am jasse
		E q’el vas lieis si defenda.
IV		Totz hom q’en folla s’enten
		En fol despen sos jornals
	30	Mas a mi vai ben sivals
		Car ren no·n qier ni n’aten
		Ni mais no·m platz que s’estenda
		En lieis merces ni dessenda,
		Car qui bon conseil non cre
	35	E·l mal acuoill e rete,
		Non par bon parlamen tenda.
V		Per so don ill vai rizen
		Torna sos safirs cristals,
		Que sa natura es aitals
	40	Que mal despen son joven
		E aura·il ops en breu menda
		En la cara sotz la benda,
		Mas mi non taing ni cove
		Q’ieu diga de lieis tal re
	45	Don autra dompna·m reprenda.
VII		Non vuoill mais don ni esmenda,
		Acort ni dura merce,
		Ni mais non creza de me
		Q’ieu per lieis al cel entenda.