Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,007 Autor: Uc de Sant Circ Gènere: Canso Número: XIII

 

Be fai granda follor

I	1	Be fai granda follor
		Qui met en fals senhor
		Tot son cor ni s’amor
		Ni tot son pessamen
	5	Per servir leyalmen,
		Que fals senher gualia
		Tot quan ves luy s’atray ;
		Per que fa folh assai
		Qui vol sa companhia,
	10	Quar greu sera qui ab fals pren companha
		Qu’al departir no·l fassa de que·s planha.
II		Per lieys qu’amada ai
		O conosc e o say
		Que fals senher dechay
	15	Ades son servidor,
		E·l dona de que plor,
		Ira e trebal e lanha
		E dolor e turmen
		E pena e marrimen ;
	20	Per que no·m plai remanha
		Jamais mos cors en sa falsa baylia,
		Ni ja Dieus mais no·m do sa senhoria.
III		Del fals gualiamen
		Que m’a fait lonjamen
	25	Mi don Dieus venjamen
		De drut fals e savay,
		Qu’aya tal cum s’eschai ;
		Et aura·l de sa guia,
		Ab cor gualiador,
	30	Que ja no·lh port honor;
		Anc prec Dieu que l’aucia,
		Quar a falsa mi par fals amicx tanha
		E qui mal quier que ja mals no·l sofranha.
IV		Si tot mi det dolor,
	35	Mal e trebal e plor,
		Amors m’a dat alhor
		Onrat entendemen
		De belh cors gay plazen ;
		Per que mos cors s’estranha
	40	De la falsa de lay ;
		Pero ardit non ay
		Que mos cors li complanha
		Lo gran dezir qu’ieu n’ay la nueg e·l dia ;
		Tal paor ai que·n perdes sa paria.
V	45	Mas ja non la perdray,
		Que ja tan quan viuray
		D’als non la preyaray,
		Que·l pretz e la valor
		E sa granda ricor
	50	E sa guaya cundia
		E·l belh aculhimen
		Prendre i a chauzimen ;
		E ren als no·lh querria,
		Quar assatz a on sa dolor refranha
	55	Qui son solatz guay e cortes guazanha.
VI		Vescontessa be·m play
		De Benauen, car jay
		C’om pros no·us ve non dia,
		Que non es bes c’a pros dona s’atanha
	60	Que sia mens de vos ni que·us sofranha.