Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,028 Author: Bertran de Born Genre: Sirventes Number: XXV

Molt m'es descendre car col

I	1	Molt m’es descendre car col
		De guerra far ab castel
		E car assaut ni cembel
		Non vim mais aura d’un an
	5	E teing m’o a gran affan
		Car il n’estan per paor
		E nos autri per s’amor
		Del seingnor de Molïerna.
II		Que·ls aguisa e·ls esmol
	10	E·ls toca coma coutel
		Lo seingner que ten Bordel,
		Mas trop son espes denan
		E moz devas lo trenchan ;
		E plus leial d’un prior
	15	Merce de l’esmoledor
		Tuit venran a vita eterna.
III		Ja·N Berlai de Mostairol
		Ni·N Guillem de Monmaurel
		No agren cor tan isnel
	20	Com nostre baro cada an
		Can ven a l’estiu intran,
		Puois quan intr’a la fredor,
		L’ardit torna en paor
		Can lo clars temps s’abüerna.
IV	25	Del seingnor de Mirandol
		Qui ten Crueissa e Martel
		No cre ogan se revel
		Troque veia que faran
		Frances que van menasan
	30	Et non son tan gabador
		Ben non atendo·l pascor
		Que oi mais plou et iverna.
V		Aragones fan gran dol,
		Catalan e cil d’Urgel,
	35	Car non an qui los capdel
		Mas .I. seignor flac e gran
		Tal que·s lausa en chantan
		E vol mais diners c’onor
		E pendet son ansessor,
	40	Per que·s destrui et enferna.
VI		Lai vir on la dens me dol
		Vas cella de cui m’es bel
		Qu’eu la repti e l’apel
		De traïcion e d’engan,
	45	Car per son leugier talan
		Soffre que·l fals feinnedor
		S’anon feinnen de s’amor
		De leis que bon pretz governa.
VII		Eu sai un austor tersol
	50	Mudat, q’anc no pres ausel,
		Franc e cortes et isnel,
		Ab cui eu m’apel Tristan ;
		E tot per aital semblan
		A·m pres per entendedor
	55	Et a·m dat mais de ricor
		Que s’era reis de Palerna.
E		Tristan, per la vostr’amor,
		Me veiran torneiador
		En Pitau, qui qe·m n’esqerna.
E'	60	Puois la reïna d’amor
		M’a pres per entendedor,
		Ben puosc far cinc et ill terna.