Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 282,014=200,001 Autor: Lanfranc Cigala , Guillelma de Rosers Género: Tenso (Partimen) Número: L

Na Guilielma, maint cavalier arratge

I	1	Na Guilielma, maint cavalier arratge
		Anan de nueg, per mal temps qe fazia,
		Si plaignian d'alberc en lur lengatge.
		Auziron dui bar qe per drudaria
	5	Se·n anavan vas lur donas non len.
		L'us se·n tornet per servir sella gen;
		L'autres anet vas sa domna corren.
		Qals d'aqels dos fes miels zo qe·il taignia?
II		Amic Lafranc, miels complit son viatge,
	10	Al mieu semblan, cel qe tenc vas s'amia,
		E l'autre fes ben, mas son fin coratge
		Non poc saber tan ben sidonz a tria
		Con cil qe·l vi denan sos oils presen,
		C'atendut l'ac sos cavaliers coven;
	15	E val trop mais qi zo qe diz aten,
		Qe qi en als son coratge cambia.
III		Domna, si·us plas, tot qan fes d'agradatge
		Lo cavalliers que per sa galiardia
		Garda·ls autres de mort e de dampnatge,
	20	Li moc d'amor, que ges de cortezia
		Non ha nuls hom si d'amor no·il dessen;
		Per qe sidonz deu·l grazir per un cen
		Qar desliuret, per s'amor, de turmen
		Tanz cavaliers, qe se vista l'avia.
IV	25	Lafranc, ia mais non razones muzatge
		Tan gran con fes d'aqel qe tenc sa via,
		Qe, sapchatz be, mout i fes gran ultratge,
		Pueis bels servirs tan de cor li movia,
		Qar non servi sidonz premeiramen;
	30	Et agra·n grat de leis e iauzimen,
		Pueis per s'amor pogra servir soven
		En maintz bos luecs qe faillir no·i podia.
V		Domna, perdon vos qier, s'ieu dic folatge,
		Q'uoi mais vei zo qe de donas crezia:
	35	Qe no vos platz q'autre pelegrinatge
		Fassan li drut, mas ves vos tota via;
		Pero cavals c'om vol qe biort gen
		Deu hom menar ab mesur'et ab sen;
		E car los drutz cochatz tan malamen,
	40	Lur faill poders, don vos sobra feunia.
VI		Lafranc, eu dic qe son malvatz usatge
		Degra laissar en aqel meteis dia
		Lo cavalliers qe domna d'aut paratge
		Bella e pros deu aver en baillia;
	45	Q'en son alberc servir'om largamen,
		Ja el no·i fos; mas chascus razon pren,
		Qar sai qe ha tan de recrezemen,
		Q'al maior ops poders li failliria.
VII		Domna, poder ai eu et ardimen,
	50	Non centra vos, qe·us venzes en iazen;
		Per q'eu fui fols car ab vos pris conten,
		Mas vencut voill que m'aiatz con qe sia.
VIII		Lafranc, aitan vos autrei e·us consen
		Qe tant mi sen de cor e d'ardimen,
	55	Cab aital geing con domna si defen
		Mi defendri'al plus ardit qe sia.