Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 185,002=457,024 Auteur: Coms de Rodez , Uc de Sant Circ Genre: Tenso (Partimen) Numero: XLIII

N'Ugo, vostre semblan digatz

I	1	[N’Ugo, vostre semblan digatz
		D’una dompna en cui m’enten,
		On ai tot mon cor e mon sen
		Pausat, e nuill’ autra no·m platz,
	5	Tant ieu l’am per drudaria.
		Mas per lieis celar volria
		Aillor preiar, si l’abellis ;
		Mas lieis no·m par que m’o sofris.
		Fe qe·m devetz, que·us n’es avis ?
	10	Pois de nuil benfaich no·m socor,
		Veda·m lo preiar per amor
		O per mal o per benvolenssa ?
		Digatz m’en vostra conoissensa.]
II		Certan, d’aisso qe·m demandatz
	15	Vos respondrai certanamen
		So qu’ieu en cre ni·m n’es parven.
		Segon la razon qe·m contatz,
		Ill ditz que no·us amaria,
		Ni vol c’aiatz autra amia,
	20	Ni·ls faitz ni·ls ditz non vos grazis.
		Aqest affars es totz devis :
		Pois qu’il no·us reten ni·us giquis
		Enquerir vostre joi aillor,
		Non vol c’aiatz ben ni honor,
	25	Ni no·m par ges q’amors la venssa,
		Pois aitals es sa captenenssa.
III		[N’Ugo, trop mal me conseillatz
		D’aisso, segon mon escien,
		Car dizetz qe·ls precs mi deffen
	30	Per mon mal ; que de ver sapchatz
		Que tant li platz ma paria
		Que per ren non soffriria
		Que nulla autra dompna enqezis
		Ni per als s’amor no·m gandis,
	35	Mas per conoisser s’ieu·l sui fis
		O si l’ai cor galiador ;
		E vos rasonatz gran folor
		Que ben par que mos bens l’agenssa,
		Pos non vol qu’ieu vir m’entendenssa.]
IV	40	Certan, fort gen vos razonatz,
		A lei d’omen que tort conten,
		Mas drutz que ama finamen,
		Non sap si sec sens o foudatz,
		Ni non conois si·s galia,
	45	Que ja puois fins non seria ;
		E vos a tant amors conquis
		Que non conoissetz si·us trahis
		O’s ama cilh cui es aclis.
		Don pois no·us laissa valedor
	50	Cossi·us pot voler mal major ?
		Si Dieus mi sal, a ma parvensa,
		Tot quant vos ditz es viltenenssa.
V		[N’Ugo, si fos sa voluntatz
		Aitals cum vos anatz dizen,
	55	Eu cre qu’il volgra veramen
		Qu’ieu fos vas autra part viratz,
		Car s’ill en cor non avia
		Qu’ilh m’ames, per qe·m tolria
		Que sivals d’autra no·m gauzis ?
	60	Eu nonca·il fis anc mal ni dis :
		Non creiria qu·il tant faillis ;
		Car cel q’a son bon servidor
		Tol que non qeira autre seignor,
		Si ben no·il fai, per ma cresenssa,
	65	Meins en deu valer sa valenssa.]
VI		Certan, vos etz ben sembellatz
		Cum l’auzels q’al sembel se pren,
		Car ses grat e ses gauzimen
		Amatz e vos non etz amatz.
	70	Pero non dic que ben sia
		Si·us enpreisona ni·us lia,
		E nuill joi de si no·us aizis
		Ni vostres precs non obezis.
		So non crei com anc mais auzis
	75	Avenir a nuill amador.
		Eu non sai causir lo meillor,
		Car greus es trop longa entendenssa,
		E mal c’om lais so que comenssa.
VII		[N’Ugo, eu voill que lo Dalfis
	80	D’Alvernge, que sap ben d’amor
		Cum ella vai e ven e cor,
		Jutge si·m veda l’entendenssa
		Per mo mal o per ben volenssa].
VIII		Seigner, cill per cui Lemozis
	85	Recep per tot lo mon honor,
		Na Maria de Ventedor,
		Dira que ben faitz gran faillensa
		Car vos avetz aital crezensa.