Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Code: 372,004 Auteur: Pistoleta Genre: Tenson fictive Numero: X

Bona domna, un conseill vos deman

I	1	Bona domna, un conseill vos deman
		que me·l dones, que molt m’a grant mestier,
		qu’en una dompn’ai mes tot mon talan,
		ne nuilla ren tan non desir ni quier ;
	5	e digatz me si laudatz que l’enquera
		de s’amistat, o enqar m’en sofieira ;
		que·l reproviers retrai certanamen :
		qui·s cuicha pert, e consec qui aten.
II		Seingner, ben dic, segon lo mieu senblan,
	10	que ben o fai qui bona domn’ enquier,
		e cel sap pauc qui la va redoptan,
		car anc domna no feri cavalher,
		mas si no·ill platz que s’amor li profera,
		no i a plus dan en neguna maneira,
	15	qe bona dompn’ a tan d’enseingnamen
		qu’ab gent parlar s’en part cortesamen.
III		Domna, eu tem que, se·ill demand s’amor,
		que·m responda so que mal me sabra,
		e que s’albir son pretz e sa ricor
	20	e que diga que ia no m’amara ;
		meill m’er, so cre, que·ill serva et atenda
		tro que·ill plassa que guizardon m’en renda ;
		e digatz me segon vostr’ essien
		si farai ben o s’eu dic faillimen.
IV	25	Seingner, totz temps fols a foillia cor,
		mas cel es fols qui la follia fa ;
		e quant hom serf la on non a valor,
		pois s’en penet que nuill gazaing non a ;
		ans deu saber que ia gaire·n despenda,
	30	si·n pot aver guizardon ni esmenda,
		e s’el conois qu’il aia bon talen,
		serva sidonz en patz e bonamen.
V		Bona domna, pois aissi m’o laudatz,
		eu l’enquerai ades senes faillir,
	35	e tenc per bon lo conseill que·m donatz,
		ne ia no·l voill cambïar ni gequir ;
		que ben sabez del domna senz faillensa,
		si val amar ni si a entendensa,
		e podetz m’en valer veraiamen,
	40	sol vos plassa ni·l cor vos o cossen.
VI		Seingner, e·us prec que la domna·m digatz
		on e·us posca e valer e servir ;
		e dic vos ben e voill que me·n crezatz
		qu’ie·us en sabrai la vertat descobrir,
	45	e far vos n’ai asina e cosensa
		maintas sasos, s’en leis non trob faillensa ;
		e digatz la ades de mantenen,
		e non doptetz ni·n aiatz espaven.
VII		Bona domna, tant es cortes’ e pros
	50	que ben sabez, s’eu vos am ni·us voill be,
		que tal ioi ai, quant puosc parlar ab vos,
		que de ren als no·m membra ni·m sove ;
		e doncs podez saber a ma semblansa
		e conoisser : mon dig vas vos balansa ;
	55	vos es cella vas cui mos cors s’aten !
		merce, domna, car tan dic d’ardimen.