Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Code: 223,003 Auteur: Guilhem Magret Genre: Canso Numero: II

Enaissi·m pren cum fai al pescador

I	1	Enaissi·m pren cum fai al pescador
		que non auza son peys maniar ni vendre
		entro que l’a mostrat a son senhor,
		qu’en tal dompna mi fai amors entendre
	5	que quant ieu fas sirventes ni chanso
		ni nulha re que·m pes que·ill sapcha bo,
		lai la tramet per so que s’en retenha
		so que·n volra e que de mi·l sovenha;
		e pueys ab lo sieu remanen
	10	deport m’ab la corteza gen.
II		Aissi cum fan volpilh encaussador,
		encaus soven so q’ieu non aus atendre,
		e cug penre ab la perditz l’austor,
		e combat so dont no mi puesc defendre,
	15	quo·l bataliers qu’a perdut son basto,
		que iays nafratz sotz l’autre campio
		e per tot so l’avol mot dir non denha,
		que per son dreg a respieg que revenha :
		si·s fai et es proat per cen,
	20	per qu’ieu n’ay maior ardimen.
III		Ardiment ai e say aver paor
		e, quan luecx es, tensonar e contendre,
		e sai celar e gen servir amor ;
		mas re no·m val, per que·m cuia·l cor fendre ;
	25	quar de son tort no·m puesc trobar perdo
		ab lieys que sap que sieus serai e so,
		qu’amors o vol, quossi qu’ill s’en captenha,
		et eu molt mais. ― Dieus don que bes m’en venha !
		Quar ses lieys non ay guerimen
	30	ni puesc poiar s’ilh non dissen.
IV		Ses tot enian e ses cor trichador
		m’aura si·l plai qu’aital mi vuelha prendre ;
		e no·y guart ges paratge ni ricor,
		q’umilitatz deu tot orguelh dissendre ;
	35	e quar ilh sap qu’anc no fis fallizo
		encontra lieys ni·l ayc talan felo ― ,
		s’aisso no·y val, cortezia no·y renha !
		E ia no·s pes de leys servir me tenha,
		car a tot bon comensamen
	40	deu aver melhor fenimen !
V		On mais la vey, la·m tenon per gensor
		miey huelh que·m fan aflamar et encendre ;
		mas ieu sai be qu’ilh a tan de valor
		qu’aisso la·m tolh, mas merces la·m pot rendre,
	45	per qu’ieu n’estau en bona sospeysso
		et estarai tro sian oc siey no
		o que baizan ab sos belhs bratz mi senha ;
		qu’esser pot ben qu’enaissi endevenha,
		qu’autre blat ai vist ab fromen
	50	afinar et ab plom argen.