Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Code: 223,004 Auteur: Guilhem Magret Genre: Canso Numero: III

Ma dompna·m ten pres

I	1	Ma dompna·m ten pres
		al costum d’Espaigna,
		car ma bona fes
		vol c’ab lei remaigna,
	5	es eu puosc anar on me vuoill ;
		c’a sos obs me gardon mei oill
		e sa valors e sa beutaz.
		Aitant val cum s’era ligaz ;
		q’en la maiso de Dedalus
	10	m’a mes amors aman reclus.
II		S’estacat m’agues
		ab un fill d’eraigna,
		si tant no·ill valgues.
		Deu prec qe·m contraigna
	15	(q’ades l’am mais on plus mi doill)
		s’eu ia costa leis me despuoill !
		C’aissi fui, qant nasquei, fadaz
		qe tot quant l’abellis, me plaz,
		et ilh ten m’ades en refus ;
	20	per q’eu quant ai calt, refredus.
III		Ab bels diz cortes
		couqer e gadaigna
		amics e plaides ;
		mas vas mi s’estraigna ;
	25	q’eu vauc e veing cum l’anhaduoill,
		enamoratz plus q’eu no suoill ;
		mas d’aitant sui meravillaz
		on es merces e pietaz,
		q’eu no·m atrob ni pauc ni plus ;
	30	et am mais e meilz que negus.
IV		Ren al mas merces
		non crei que·l soffraigna,
		qe toz aibs i es
		q’a pro dompna taigna.
	35	Humilitat a et orguoill,
		lai on taing, e tant gent acuoill
		q’om non es tant mal enseignaz
		que de llei no·s parta pagaz,
		e quant s’en es partiz chascus,
	40	non tem q’om de null mal l’acus.
V		Reis aragones,
		legatz de Romaigna,
		e dux e marques,
		e coms de Sardaigna,
	45	gent avez esclarzit l’escuoill
		e del froment triat lo zoill,
		q’el loc de Saint Peir’es pausaz
		e drechuriers reis coronaz !
		E pos deus vos a mes lai sus,
	50	menbre·us de nos que em za ius !